სომალის, ეგვიპტის, თურქეთისა და ჯიბუტის საგარეო საქმეთა მინისტრები გმობენ ისრაელის მიერ სომალილენდის აღიარებას

ეგვიპტის განცხადებით, სომალის, ეგვიპტის, თურქეთისა და ჯიბუტის საგარეო საქმეთა მინისტრები გმობენ ისრაელის მიერ სომალილენდის - სომალის სეპარატისტული რეგიონის - აღიარებას. ინფორმაციას ამის შესახებ ისრაელური მედია ავრცელებს.

„მინისტრებმა დაადასტურეს სომალილენდის რეგიონის ისრაელის მიერ აღიარების სრული უარყოფა და დაგმობა. მათ ხაზი გაუსვეს სომალის ერთიანობის, სუვერენიტეტისა და ტერიტორიული მთლიანობის სრულ მხარდაჭერას“, - ნათქვამია ეგვიპტის საგარეო საქმეთა სამინისტროს განცხადებაში, რომელიც ეგვიპტის საგარეო უწყების ხელმძღვანელსა და მის სომალელ, თურქ და ჯიბუტელ კოლეგებს შორის გამართული სატელეფონო საუბრის შემდეგ გავრცელდა.

ისრაელი გახდა პირველი სახელმწიფო, რომელმაც სომალილენდის რესპუბლიკა დამოუკიდებელ სახელმწიფოდ აღიარა.

სომალილენდს 1960 წელს ხუთდღიანი დამოუკიდებლობა ჰქონდა, რა დროსაც იგი ისრაელმა და 34-მა სხვა ქვეყანამ აღიარა, ვიდრე სომალის შეუერთდებოდა.

სომალილენდი ოფიციალურად 1991 წელს გამოეყო სომალის და მიუხედავად იმისა, რომ სხვა ქვეყნებს ის არ უღიარებიათ, რამდენიმე ძლიერი სახელმწიფო - დიდი ბრიტანეთი, ეთიოპია, თურქეთი, არაბთა გაერთიანებული საამიროები, დანია, კენია და ტაივანი - იქ წარმომადგენლობით ოფისებს ინარჩუნებდა.