აშშ-ის კონგრესის იურიდიულ საკითხთა კომიტეტი ევროკომისიას: თქვენს ბიუროკრატებს ანონიმურობის უფლება არ აქვთ

ევროპელ მაღალჩინოსნებს ანონიმურობის უფლება არ უნდა ჰქონდეთ, - განაცხადა აშშ-ის კონგრესის გავლენიანი კომიტეტის წარმომადგენელმა. ინფორმაციას ამის შესახებ გამოცემა POLITICO ავრცელებს.

ეს იყო მკვეთრი პასუხი ბრიუსელის კრიტიკაზე იმ ანგარიშის მიმართ, რომელშიც დასახელებული იყვნენ ევროკავშირის ციფრულ რეგულაციებზე მომუშავე დაბალი რანგის მოხელეები.

„სამთავრობო მოხელეები - იქნება ეს შეერთებულ შტატებში, ევროკავშირში თუ სხვაგან - ემსახურებიან ხალხს და მათ წინაშე უნდა იყვნენ ანგარიშვალდებულნი“, - განაცხადა აშშ-ის წარმომადგენელთა პალატის იურიდიულ საკითხთა კომიტეტის სპიკერმა, ნადჯი ფონსმა.

მისი თქმით, ევროკომისიის მაღალჩინოსნები საკუთარი თავისთვის ანონიმურობას მოითხოვდნენ, მაშინ როდესაც ისეთ პოლიტიკას ატარებენ, რომელიც ევროპის შიგნით და მის ფარგლებს გარეთ მომხმარებლებისთვის ონლაინ ანონიმურობას გააუქმებდა.

კომიტეტმა, რომელსაც კონგრესმენი ჯიმ ჯორდანი ხელმძღვანელობს, თებერვალში გამოაქვეყნა ანგარიში, სადაც ევროკომისიას აშშ-ის არჩევნებში ჩარევასა და „ციფრული მომსახურების აქტის“ (DSA) მეშვეობით როგორც ევროკავშირის, ასევე აშშ-ის მოქალაქეების სიტყვის თავისუფლების ცენზურაში სდებს ბრალს.

ანგარიში მოიცავდა დაახლოებით 3 000 გვერდ მასალას და შეიცავდა მიმოწერას ოფიციალურ პირებს, სამოქალაქო საზოგადოებასა და ინდუსტრიის წარმომადგენლებს შორის. მასში მითითებული იყო ევროკომისიის სამსახურების დაახლოებით 20 თანამშრომლის ვინაობა, ასევე ინფორმაცია, რომლის საფუძველზეც მათი ელექტრონული ფოსტის მისამართების დადგენა იყო შესაძლებელი. თუმცა, მსხვილ ტექნოლოგიურ კომპანიებში მომუშავე პირთა სახელები ძირითადად დაფარული იყო.

ბრიუსელში ეს ნაბიჯი შეფასდა, როგორც მცდელობა იმ მოხელეების დასაშინებლად, რომლებიც ციფრული წესების აღსრულებაზე მუშაობენ.

ევროკომისიამ დაბალი რანგის მოხელეების ვინაობის გამოქვეყნება 2023 წელს შეწყვიტა და გადაწყვიტა, რომ ამიერიდან მხოლოდ მაღალი რანგის თანამშრომელთა სახელები გაასაჯაროოს. ეს გადაწყვეტილება დასაბუთდა პოლიტიკის შემუშავების პროცესში არაჯეროვანი გავლენის თავიდან აცილებისა და იმ პირებზე ზეწოლის აღკვეთის სურვილით, რომლებიც სენსიტიურ საკითხებზე მუშაობენ.