ისრაელმა ბეირუთში „ჰეზბოლას“ დაზვერვის ხელმძღვანელის ლიკვიდაციის შესახებ განაცხადა

ისრაელის თავდაცვის ძალების პრესსამსახურის განცხადებით, ბეირუთში, ისრაელის სამხედროების მიერ განხორციელებული დარტყმის შედეგად, დაჯგუფება „ჰეზბოლას“ დაზვერვის შტაბის უფროსი ჰუსეინ მაკლედი მოკლეს.

„ცაჰალის“ განცხადებით, მაკლედი „ზუსტი დარტყმის შედეგად“ იყო ლიკვიდირებული. სხვა დეტალები ჯერჯერობით არ ვრცელდება.

2 მარტის ღამეს „ჰეზბოლამ“ ისრაელის მიმართულებით რაკეტები და დრონები გაუშვა; დაჯგუფებამ ეს დარტყმები ირანის უზენაესი ლიდერის, ალი ხამენეის მკვლელობისთვის შურისძიებით ახსნა.„ჰეზბოლას“ თავდასხმების საპასუხოდ, ისრაელის თავდაცვის ძალებმა ბეირუთსა და სამხრეთ ლიბანში „ჰეზბოლასთან“ დაკავშირებულ რამდენიმე ათეულ სამიზნეზე მიიტანეს იერიში.

28 თებერვალს აშშ-მა და ისრაელმა ირანზე იერიში მიიტანეს. შედეგად დაიღუპა ქვეყნის უზენაესი ლიდერი, აიათოლა ალი ხამენეი და სხვა მაღალჩინოსნები. საპასუხოდ, ირანი უკვე მესამე დღეა, დრონებითა და რაკეტებით უტევს ისრაელს, ისევე როგორც აშშ-ის მოკავშირე ქვეყნებს სპარსეთის ყურეში.