The Wall Street Journal: გაეროს ატომური სააგენტოს დავაში, რომელიც უკრაინის ბირთვულ ენერგოობიექტებზე თავდასხმების საფრთხეს ეხებოდა, აშშ პირველად დადგა რუსეთისა და ჩინეთის მხარეს

ხუთშაბათს, გაეროს ატომური სააგენტოს დავაში, რომელიც უკრაინის ბირთვულ ენერგოობიექტებზე თავდასხმების საფრთხეს ეხებოდა, აშშ პირველად დადგა რუსეთისა და ჩინეთის მხარეს, რაც ვაშინგტონის მოსკოვთან მზარდ დაახლოებაზე მიუთითებს, - წერს ამერიკული გამოცემა The Wall Street Journal-ი.

აშშ-მა გაეროს ატომურ სააგენტოში მხარი არ დაუჭირა რეზოლუციას, რომელსაც მხარს უჭერდნენ ევროპული ქვეყნები, ავსტრალია, კანადა, არგენტინა, ჩილე და სხვები.

The Wall Street Journal-ის მიერ მოპოვებული პროექტის თანახმად, რეზოლუციაში რუსეთი ნახსენები არ იყო. მასში ნათქვამი იყო, რომ უკრაინის ელექტროქვესადგურებსა და სხვა ენერგეტიკულ ინფრასტრუქტურაზე თავდასხმები პირდაპირ საფრთხეს უქმნის ბირთვულ უსაფრთხოებას.

აშშ-ის წინააღმდეგობის მიუხედავად, რეზოლუცია 20 ხმით 4-ის წინააღმდეგ მაინც მიიღეს. ნიგერი იყო ერთადერთი სხვა ქვეყანა, რომელმაც მას მხარი არ დაუჭირა.

აშშ-ის წარმომადგენელმა, ჰოვარდ სოლომონმა განაცხადა, რომ აშშ იზიარებს შეშფოთებას უკრაინის ენერგეტიკული ინფრასტრუქტურისადმი არსებული პოტენციური საფრთხის გამო და ყველა მხარეს მოუწოდა, თავი შეიკავონ ისეთი ქმედებებისგან, რამაც შესაძლოა ბირთვული უსაფრთხოების ინციდენტი გამოიწვიოს.

თუმცა, მისი თქმით, აშშ-მა მხარი არ დაუჭირა „არასაჭირო რეზოლუციას, რომელიც არ უწყობს ხელს უკრაინასა და რუსეთს შორის მშვიდობის დამყარებას“.