გერმანიის თავდაცვის მინისტრი ჰორმუზის სრუტეში გემების გაგზავნაზე უარს აცხადებს - „ეს ჩვენი ომი არ არის“

გერმანიის თავდაცვის მინისტრმა ბორის პისტორიუსმა განაცხადა, რომ ბერლინი დონალდ ტრამპის მოწოდების საფუძველზე​ ჰორმუზის სრუტის უსაფრთხოების უზრუნველსაყოფად სამხედრო ხომალდებს არ გაგზავნის. მის სიტყვებს Tagesschau ავრცელებს.

„ეს არ არის ჩვენი ომი, ის ჩვენ არ დაგვიწყია. ჩვენ გვსურს დიპლომატიური გადაწყვეტილებები და [ომის] სწრაფი დასრულება, მაგრამ რეგიონში დამატებითი სამხედრო ხომალდების გაგზავნა ამას, რა თქმა უნდა, ხელს არ შეუწყობს“, - განაცხადა პისტორიუსმა.

მან ხაზგასმით აღნიშნა, რომ აშშ-მა და ისრაელმა „ეს გზა თავად აირჩიეს“.

„ჩვენ ამას ძალიან ზომიერად ვაკრიტიკებდით. თუმცა, შემდეგი ნაბიჯი ახლა ჩვენს ამ კონფლიქტში ჩათრევის საფრთხეს ქმნის“, - დასძინა მინისტრმა.

მანამდე The Telegraph-ი წერდა, რომ სტარმერმა ტრამპს ჰორმუზის სრუტეში ბრიტანული სამხედრო გემების გაგზავნაზე უარი უთხრა. მანამდე აშშ-ის პრეზიდენტმა აღნიშნა, რომ ნატოს „ძალიან ცუდი“ მომავალი ელის, თუ მოკავშირეები ჰორმუზის სრუტეში ვაშინგტონს არ დაეხმარებიან. დონალდ ტრამპმა ასევე განაცხადა, რომ დაიმახსოვრებს, თუ სხვა ქვეყნები აშშ-ს არ დაეხმარებიან.