მერცი აცხადებს, რომ ირანი ამერიკის შეერთებულ შტატებს ამცირებს

გერმანიის კანცლერმა, ფრიდრიხ მერცმა განაცხადა, რომ ირანის ხელმძღვანელობა ამცირებს ამერიკის შეერთებულ შტატებს და აიძულებს აშშ-ის ოფიციალურ პირებს ჩავიდნენ პაკისტანში, შემდეგ კი იქაურობა ყოველგვარი შედეგის გარეშე დატოვონ.

მერცმა ასევე აღნიშნა, რომ იგი ვერ ხედავს, თუ რა გამოსავლის სტრატეგიას მიჰყვება აშშ ირანის ომში.

„ირანელები აშკარად ძალიან დახვეწილები არიან მოლაპარაკებების წარმოებაში, ან უფრო მეტიც - ძალიან დახვეწილები არიან იმაში, რომ არ აწარმოონ მოლაპარაკებები; ისინი აიძულებენ ამერიკელებს ჩავიდნენ ისლამაბადში, შემდეგ კი იქაურობა კვლავ ყოველგვარი შედეგის გარეშე დაატოვებინონ“, - განაცხადა მან ქალაქ მარსბერგში სტუდენტებთან საუბრისას.

„ირანის ხელმძღვანელობა, განსაკუთრებით კი ეს ე.წ. რევოლუციის გუშაგთა კორპუსი, მთელ ქვეყანას ამცირებს. ამიტომ, იმედი მაქვს, რომ ეს ყველაფერი რაც შეიძლება სწრაფად დასრულდება“, - დასძინა მან.

მერცმა კიდევ ერთხელ აღნიშნა, რომ გერმანელებთან და ევროპელებთან კონსულტაციები არ გაუვლიათ მანამ, სანამ აშშ-მა და ისრაელმა 28 თებერვალს ირანზე თავდასხმა დაიწყეს და დასძინა, რომ საკუთარი სკეპტიციზმი მოგვიანებით ტრამპს პირადად გაუზიარა.

„რომ მცოდნოდა, თუ ეს ყველაფერი ხუთი ან ექვსი კვირა ასე გაგრძელდებოდა და თანდათანობით გაუარესდებოდა, მას კიდევ უფრო კატეგორიულად ვეტყოდი“, - განაცხადა მერცმა და აღნიშნული ვითარება ერაყსა და ავღანეთში აშშ-ის მიერ მანამდე წარმოებულ ომებს შეადარა.