ბელარუსში ბირთვული იარაღის საბრძოლო გამოყენების სწავლებები დაიწყო

ბელარუსის თავდაცვის სამინისტრომ ბირთვული იარაღის საბრძოლო გამოყენებისა და ბირთვული უზრუნველყოფის ქვედანაყოფების სწავლებების დაწყების შესახებ გამოაცხადა.

როგორც უწყების მიერ გავრცელებულ განცხადებაშია ნათქვამი, სწავლებების მიზანია, მათ შორის, „შეიარაღების, სამხედრო და სპეციალური ტექნიკის ამოცანების შესასრულებლად მზადყოფნის შემოწმება და არაგეგმური რაიონებიდან საბრძოლო გამოყენების ორგანიზება“.

ძირითადი აქცენტი გაკეთდება ისეთი საკითხების დამუშავებაზე, როგორიცაა ფარულობა, დიდ მანძილებზე გადაადგილება და ძალებისა და საშუალებების გამოყენებისთვის საჭირო გათვლების წარმოება.

სწავლებები რუსულ მხარესთან ერთად ტარდება, რომელთანაც „დაგეგმილია ბირთვული საბრძოლო მასალის მიწოდებისა და მათი გამოყენებისთვის მომზადების საკითხების დამუშავება“.

ბელარუსის თავდაცვის სამინისტრომ ხაზგასმით აღნიშნა, რომ სწავლებებს გეგმური ხასიათი აქვს, „არ არის მიმართული მესამე ქვეყნების წინააღმდეგ და საფრთხეს არ უქმნის რეგიონულ უსაფრთხოებას“.