ევროკომისიამ გააკრიტიკა აშშ-ის გეგმები ევროკავშირისთვის ახალი 10-პროცენტიანი ტარიფის დაწესების შესახებ მას შემდეგ, რაც ტრამპის ადმინისტრაციამ დაადგინა, რომ ბრიუსელმა ვერ შეძლო იძულებითი შრომით დამზადებული საქონლის იმპორტის აკრძალვა

ევროკომისიამ გააკრიტიკა აშშ-ის გეგმები ევროკავშირისთვის ახალი 10-პროცენტიანი ტარიფის დაწესების შესახებ მას შემდეგ, რაც ტრამპის ადმინისტრაციამ დაადგინა, რომ ბრიუსელმა ვერ შეძლო იძულებითი შრომით დამზადებული საქონლის იმპორტის აკრძალვა. ინფორმაციას ამის შესახებ გამოცემა POLITICO ავრცელებს.

„ევროკომისია ყურადღებით გააანალიზებს გამოძიების წინასწარ შედეგებს და გააგრძელებს თანამშრომლობას აშშ-ის ადმინისტრაციასთან. ამის მიუხედავად, ევროკავშირი მიიჩნევს, რომ ამ საფუძვლით დაწესებული ტარიფები გაუმართლებელია“, - განაცხადა ევროკომისიის პრესსპიკერის მოადგილემ, ოლოფ გილმა გავრცელებულ განცხადებაში.

აშშ-ის სავაჭრო წარმომადგენლის ოფისმა სამშაბათს გვიან საღამოს გამოქვეყნებულ ანგარიშში განაცხადა, რომ სურს ხელახლა დააწესოს 10-პროცენტიანი ტარიფი თავის მთავარ სავაჭრო პარტნიორებზე - მათ შორის ევროკავშირზე, კანადასა და მექსიკაზე - მას შემდეგ, რაც დაადგინა, რომ მათ ვერ უზრუნველყვეს იმ კანონების აღსრულება, რომლებიც იძულებითი შრომით დამზადებული საქონლის აკრძალვას ითვალისწინებს.

ეს არის ერთ-ერთი იმ ორი მასშტაბური სავაჭრო გამოძიებიდან, რომელიც ადმინისტრაციამ ამ გაზაფხულზე, 1974 წლის სავაჭრო აქტის 301-ე მუხლის საფუძველზე დაიწყო. მიზანი აშშ-ის პრეზიდენტის, დონალდ ტრამპის იმ გლობალური ტარიფების აღდგენაა, რომლებიც აშშ-ის უზენაესმა სასამართლომ თებერვალში გააუქმა. ამჟამად მოქმედ 10-პროცენტიან დროებით ტარიფს ვადა ივლისში ეწურება, რის შემდეგაც ამოქმედდება 301-ე მუხლით გათვალისწინებული ტარიფი.

ბერნდ ლანგემ, ევროპარლამენტის სავაჭრო კომიტეტის თავმჯდომარემ, განაცხადა, რომ უზენაეს სასამართლოში მარცხის შემდეგ ვაშინგტონი „სასოწარკვეთილი ეძებს ახალ სამართლებრივ საფუძვლებს საკუთარი სატარიფო პოლიტიკის შესანარჩუნებლად“.

„ევროკავშირის დადანაშაულება იმაში, რომ ის არ აკეთებს საკმარისს იძულებითი შრომის წინააღმდეგ, აბსურდულია“, - დაწერა ლანგემ სოციალურ ქსელ X-ში გამოქვეყნებულ პოსტში. „ევროკავშირმა მიიღო მსოფლიოში ყველაზე მკაცრი წესები იძულებითი შრომით დამზადებული პროდუქციის წინააღმდეგ. ეს ძალიან ჰგავს მცდელობას, ფაქტები მოარგონ ტარიფების იმ სამართლებრივ დასაბუთებას, რომელიც წინასწარვე იყო გადაწყვეტილი“.