უკრაინული გამოცემა Європейська правда: რა ლგბტ+ უფლებების უზრუნველყოფაა საჭირო ევროკავშირში გაწევრიანებისთვის და რატომ აფერხებს უკრაინა ამ პროცესს

უკრაინის პარლამენტს რეგისტრირებული პარტნიორობის ინსტიტუტის შესახებ ორი კანონპროექტის განხილვაში პროგრესი ჯერ კიდევ არ აქვს. უფრო მეტიც, პოტენციურ უკან გადადგმულ ნაბიჯს შეიცავს ახალი სამოქალაქო კოდექსის პროექტი, - წერს უკრაინული გამოცემა Європейська правда სტატიაში სათაურით „რა ლგბტ+ უფლებების უზრუნველყოფაა საჭირო ევროკავშირში გაწევრიანებისთვის და რატომ აფერხებს უკრაინა ამ პროცესს“.

ევროკავშირში გაწევრიანების კრიტერიუმების შესრულების კონტექსტში, ამ კანონპროექტის მთავარი პრობლემა მდგომარეობს ტერმინ „ოჯახის“ გაგების შევიწროებასა და ახალი ტერმინის - „ფაქტობრივი ოჯახური კავშირის“ შემოღებაში, რომელიც განისაზღვრება ექსკლუზიურად როგორც საპირისპირო სქესის ორი პირის ერთობლივი ცხოვრება ერთ ოჯახად, ქორწინების რეგისტრაციის გარეშე.

დიპლომატი და უფლებადამცველი, ზორიან კისი განმარტავს, რომ ლგბტ+ უფლებების კონტექსტში უკრაინამ უნდა შეიმუშაოს და მიიღოს კანონმდებლობა, რომელიც უზრუნველყოფს ამ ადამიანების უფლებების დაცვისა და პატივისცემის სამ საკვანძო ელემენტს: ერთნაირსქესიანი წყვილების სამართლებრივ აღიარებას; თანაბარი უფლებების გარანტიებსა და დისკრიმინაციისგან დაცვას ცხოვრების ყველა სფეროში (და არა მხოლოდ შრომის სფეროში); სიძულვილით მოტივირებულ დანაშაულებთან და სიძულვილის ენასთან ბრძოლის ქმედით მექანიზმს.

ამ „საშინაო დავალების“ ძირითადი ნაწილი უკვე შესრულებულია, აღნიშნავს ზორიან კისი.

„საუბარია იმაზე, რომ ლგბტქი+ ადამიანების უფლებების პატივისცემა ევროკავშირის საფუძვლების განუყოფელი ნაწილია: ადამიანის უფლებების პატივისცემა და უმცირესობების დაცვა. ეს ორი პრინციპი ჯერ კიდევ ევროკავშირის წევრობის „კოპენჰაგენის კრიტერიუმებშია“ დაფიქსირებული და ეს არ არის მენიუ, საიდანაც შეიძლება მხოლოდ „ტკბილეულის“ არჩევა: იმის, რაც მოგწონს, ან იმის, რისთვისაც „საზოგადოება მზად არის“, - ხაზს უსვამს უფლებადამცველი.

მოლაპარაკებების 23-ე განყოფილების („ძირითადი უფლებები“) ორი კრიტერიუმი სწორედ ლგბტქი+ ადამიანების უფლებებს ეხება.

ადამიანის უფლებათა ევროპულმა სასამართლომ 2023 წლის 1-ლი ივნისის გადაწყვეტილებაში საქმეზე „მაიმულახინი და მარკივი უკრაინის წინააღმდეგ“ პირველად პირდაპირ აღიარა, რომ უკრაინაში ერთნაირსქესიანი წყვილების იურიდიული აღიარებისა და დაცვის რაიმე ფორმის არარსებობა დისკრიმინაციას წარმოადგენს.

„ჩვენ ერთხელ და სამუდამოდ უნდა გავთავისუფლდეთ ანტიგენდერული მოძრაობის მანიპულაციური ნარატივებისგან და დარწმუნებით ვიაროთ წინ - იქით, საითკენაც ჩვენი ცივილიზაციური არჩევანია მიმართული. შეუძლებელია აცხადებდე ევროპულ ოჯახში დაბრუნების შესახებ და ამავდროულად აკოპირებდე მოსკოვის სამართლებრივ მიდგომებს, მათ „ტრადიციული ფასეულობების დაცვის“ საფარქვეშ ნიღბავდე“, - ხაზგასმით აღნიშნა დიპლომატმა.