Brussels Signal: გერმანიის არმიამ 300 000-იანი რეზერვის შექმნა სცადა, მაგრამ მხოლოდ 530 რეკრუტი მიიღო

ახალი სამხედრო სავალდებულო შეფასების სისტემის ფარგლებში, თითქმის 300 ათასი ახალგაზრდა გერმანელისთვის კითხვარების გაგზავნის შემდეგ, ბუნდესვერმა 2026 წელს ნებაყოფლობითი სამხედრო სამსახურისთვის მხოლოდ 530 თანხმობა მიიღო. ინფორმაციას გამოცემა Brussels Signal-ი ავრცელებს.

თავდაცვის სამინისტროს მიერ გამოქვეყნებული მონაცემების მიხედვით, ივნისის შუა რიცხვებისთვის სულ 298 200 კითხვარი იყო დაგზავნილი. აქედან დაახლოებით 153 200 კაცებს გაეგზავნათ, 145 000 კი ქალებს.

მიუხედავად იმისა, რომ კაცების მხრიდან პასუხების მაჩვენებელი მაღალი იყო და 96%-ს შეადგენდა, მათი ნებაყოფლობით სამსახურში რეალური გადასვლის კოეფიციენტი უკიდურესად დაბალი აღმოჩნდა. ამ დროისთვის სამედიცინო და შესარჩევი პროცედურები მხოლოდ 1 500-მდე ადამიანმა გაიარა, ხოლო 2026 წელს სამსახურისთვის ოფიციალური თანხმობა მხოლოდ 530-მა განაცხადა. კითხვარში სამხედრო სამსახურის მიმართ გარკვეული ინტერესი ყოველმა მეხუთე ახალგაზრდა კაცმა დააფიქსირა, თუმცა აბსოლუტურ უმრავლესობას ოფიციალურ გაწვევამდე საქმე არ მიუყვანია.

კითხვარების ახალი სისტემა, რომელიც 2026 წლის დასაწყისში შემოიღეს, მიზნად ისახავდა მოტივირებული წვევამდელების გამოვლენას სრული სავალდებულო სამხედრო გაწვევის აღდგენის გარეშე, თუმცა პირველადი შედეგები აჩვენებს, რომ ეს მექანიზმი საჭირო რაოდენობის უზრუნველყოფას ვერ ახერხებს.

Brussels Signal-ი წერს, რომ ეს ციფრები მაშინ ქვეყნდება, როდესაც გერმანია 2030-იანი წლების შუა პერიოდისთვის ბუნდესვერის 260 ათას ჯარისკაცსა და 200 ათას რეზერვისტამდე გაზრდას ცდილობს. ეს გერმანიას ომის შემთხვევაში 460 000-მდე ჯარისკაცის მობილიზების საშუალებას მისცემს. ეს გაფართოება აუცილებელ პირობად მიიჩნევა იმისთვის, რომ გერმანიამ ნატოს წინაშე აღებული ვალდებულებები შეასრულოს და ევროპაში შეცვლილ უსაფრთხოების გარემოს უპასუხოს.

ექსპერტები და ოპოზიციონერი პოლიტიკოსები ამ წარუმატებლობის რამდენიმე მუდმივ მიზეზზე მიუთითებენ: სამხედრო ანაზღაურება და პირობები ჩამორჩება სამოქალაქო შრომის ბაზარს, სამუშაო საათები და დისლოკაციის ადგილები არამიმზიდველია, ბევრ ახალგაზრდას შეიარაღებულ ძალებზე უარყოფითი წარმოდგენა აქვს, გერმანიის მჭიდრო შრომის ბაზარზე არსებული ძლიერი კონკურენცია კი სკოლისა და უნივერსიტეტის კურსდამთავრებულებს უამრავ უფრო მაღალანაზღაურებად ალტერნატივას სთავაზობს. პოტენციურ რეკრუტებს ასევე აფრთხობს გაჭიანურებული ბიუროკრატიული პროცესები და გადაწყვეტილების მიღების ხანგრძლივი ვადები.