AP: პოლონეთში აცხადებენ, რომ ვარშავაში რუსეთის მიერ აშშ-ის მოქალაქის მკვლელობის გეგმა აღკვეთეს

პოლონეთის პრემიერ-მინისტრის დონალდ ტუსკის განცხადებით, ქვეყანაში აღკვეთეს რუსეთის გეგმა, რომლის ფარგლებშიც ვარშავაში უკრაინული წარმოშობის აშშ-ის მოქალაქის მკვლელობა იგეგმებოდა. ინფორმაციას Associated Press-ი ავრცელებს.

ტუსკის თქმით, ეს პირველი შემთხვევაა, როდესაც „რუსეთის დავალებით“ ვინმემ ნატოს სხვა წევრი ქვეყნის ტერიტორიაზე აშშ-ის მოქალაქეზე თავდასხმა სცადა.

დასავლელი ოფიციალური პირები წარსულშიც აფრთხილებდნენ, რომ რუსეთის მიერ შეკვეთილი მკვლელობების კამპანია პრეზიდენტ ვლადიმირ პუტინის მიერ უკრაინაში 2022 წელს შეჭრის შემდეგ გააქტიურდა. მათი განცხადებით, ევროპის მასშტაბით არაერთი მსგავსი გეგმა იქნა აღკვეთილი. თუმცა, პოლონეთის პრემიერ-მინისტრის თქმით, ეს შემთხვევა უპრეცედენტოა, წერს სააგენტო.

ეჭვმიტანილი, რომელიც, სავარაუდოდ, რუსეთის სპეცსამსახურებმა გადაიბირეს, პოლონეთის ხელისუფლებამ 7 აგვისტოს დააკავა. ვარშავის პოლიციის განცხადებით, მას სამთვიანი წინასწარი პატიმრობა შეეფარდა.

ტუსკმა პრესკონფერენციაზე განაცხადა, რომ უკრაინული წარმოშობის აშშ-ის მოქალაქე „პუტინის რეჟიმისთვის არასასურველი პირი იყო“, თუმცა დეტალებზე არ უსაუბრია.

პოლონეთის დაზვერვის სამსახურებზე პასუხისმგებელი მინისტრის, ტომაშ სიემონიაკის განცხადებით, ოპერაცია აშშ-ის შესაბამის სამსახურებთან თანამშრომლობით ჩატარდა. მისი თქმით, თავდასხმის სამიზნე იყო „უკრაინული წარმოშობის“ აშშ-ის მოქალაქე. ოფიციალურ პირებს დამატებითი დეტალები არ გაუვრცელებიათ.

აშშ-ის სახელმწიფო დეპარტამენტმა განაცხადა, რომ გავრცელებული ცნობების შესახებ ინფორმირებულია, თუმცა დამატებითი ინფორმაცია არ აქვს.

რუსეთს დიდი ხანია ადანაშაულებენ საზღვარგარეთ მცხოვრები ადამიანების წინააღმდეგ ოპერაციების განხორციელებაში, მათ შორის იშვიათი შხამების გამოყენებით. თუმცა, დაზვერვის წარმომადგენლებმა Associated Press-ს მანამდე განუცხადეს, რომ რუსეთის უსაფრთხოების სამსახურები სამიზნეების არჩევისას ახლა უფრო გათამამებულად მოქმედებენ და მიზანში იღებენ როგორც რუს აქტივისტებსა და სამხედრო დეზერტირებს, ისე უკრაინის უცხოელ მხარდამჭერებს.

„უნდა ვივარაუდოთ, რომ პუტინის რეჟიმი მსოფლიოს სხვადასხვა ადგილას, სხვადასხვა მიზეზით, შეეცდება მოიშოროს ადამიანები, რომლებიც მისთვის არასასურველები არიან“, - განაცხადა ტუსკმა. მისი თქმით, პოლონეთი და სხვა ქვეყნები მსგავსი ქმედებების წინააღმდეგ მოქმედებისთვის მზად უნდა იყვნენ.

დასავლელი ოფიციალური პირები ამ კამპანიას რუსეთის უფრო ფართო ძალისხმევის ნაწილად მიიჩნევენ, რომელიც უკრაინის მხარდამჭერი ევროპული ქვეყნების დასუსტებას ისახავს მიზნად. Associated Press-მა ომის დაწყებიდან ევროპაში დივერსიის, ცეცხლის წაკიდებისა და სხვა სახის საბოტაჟის დაახლოებით 200 შემთხვევა გამოავლინა, რომლებიც ოფიციალური პირების შეფასებით, რუსეთთან იყო დაკავშირებული. პრეზიდენტმა ვლადიმირ პუტინმა ივნისში სააგენტოს განუცხადა, რომ რუსეთი ევროპაში დივერსიულ კამპანიას არ აწარმოებს.