ირანი სპარსეთის ყურეში ახალი შეზღუდული ზონის შექმნას გეგმავს

ირანში განაცხადეს, რომ უახლოეს დღეებში სპარსეთის ყურეში ახალ შეზღუდულ ზონას გამოაცხადებს და ჰორმუზის სრუტეში ახალი საზღვაო დერეფნის რუკებს გამოაქვეყნებს, რადგან შაბათ-კვირას გემებზე მიტანილმა საპასუხო დარტყმებმა ორშაბათს ნავთობის ფასების ზრდა გამოიწვია.

ახალი შეზღუდული ზონა დაიწყება იქიდან, სადაც აშშ-ის მიერ ირანის ბლოკადა იწყება და სპარსეთის ყურის ტერიტორიებზე გავრცელდება, - განაცხადა ირანის სახელმწიფო ტელევიზიასთან ინტერვიუში ქვეყნის ეროვნული უსაფრთხოების უმაღლესი საბჭოს მდივანმა მოჰსენ რეზაიმ.

გეგმის შესახებ დეტალები ცოტაა ცნობილი, თუმცა რეზაიმ აღნიშნა, რომ ნებისმიერი გემი, რომელიც ახალ ზონაში შევა, სანქციების სიაში მოხვდება.

გარდა ამისა, რეზაის თქმით, მალე დამტკიცდება რუკებიც, რომლებიც დეტალურად ასახავს გადაადგილების მარშრუტებს ჰორმუზის სრუტეში - ენერგორესურსების გადაზიდვისთვის სასიცოცხლოდ მნიშვნელოვან დერეფანში, რომელიც ტანკერების მოძრაობისთვის დიდწილად ჩაკეტილია.

„ახალი საერთაშორისო დერეფნის რუკები, რომელიც ირანისა და ომანის წყლებში მდებარეობს და რომელსაც ირანი მართავს, შეთანხმებულია და უახლოეს დღეებში ხელი უნდა მოეწეროს. ჩვენ ჰორმუზის სრუტის გახსნის ვალდებულებას მხოლოდ მაშინ ავიღებთ, როდესაც ისინი [ამერიკელები] შეწყვეტენ დივერსიებს, მუქარასა და თავდასხმებს ირანზე“, - დასძინა რეზაიმ.