Bloomberg: ტრამპმა ზელენსკის მოუწოდა ჩავიდეს მოსკოვში და პუტინს შეხვდეს

აშშ-ის პრეზიდენტმა დონალდ ტრამპმა მიმდინარე კვირაში უკრაინის პრეზიდენტს ვოლოდიმირ ზელენსკის კვლავ მოუწოდა რუსეთის ლიდერთან ვლადიმირ პუტინთან შესახვედრად მოსკოვში ჩასულიყო, მიუხედავად უკრაინის პრეზიდენტის არაერთი უარისა. ინფორმაციას Bloomberg-ი ავრცელებს.

სააგენტოს ცნობით, ამ გზით ვაშინგტონი უკრაინასა და რუსეთს შორის სამშვიდობო მოლაპარაკებების განახლებას ცდილობს.

როგორც Bloomberg-ი წერს, ზელენსკიმ ტრამპის შეთავაზება გაეროში აშშ-ის პრეზიდენტთან შეხვედრისას უარყო. უკრაინის პრეზიდენტთან დაახლოებული პირების განცხადებით, ტრამპის მიერ საკითხის ხელახლა წამოწევამ ზელენსკი გააღიზიანა.

როდესაც რუსმა ჟურნალისტებმა ნიუ-იორკში მყოფ ზელენსკის ჰკითხეს, როდის გაემგზავრებოდა მოსკოვში, მან უპასუხა: „რაკეტაზე“, რასაც უცენზურო სიტყვა დაამატა.

ზელენსკიმ და რუსეთის საგარეო საქმეთა მინისტრმა სერგეი ლავროვმა მიმდინარე კვირაში ნიუ-იორკში ტრამპის ადმინისტრაციის წარმომადგენლებთან ცალ-ცალკე შეხვედრები გამართეს.

აშშ ორივე მხარეს მოუწოდებს, შეთანხმდნენ ერთმანეთის ენერგეტიკულ ობიექტებზე თავდასხმების შეჩერებაზე, მაშინ როდესაც მსოფლიოში დიზელის ფასი მკვეთრად იზრდება. თუმცა, ამ ეტაპზე არც უკრაინას და არც რუსეთს შეთავაზება არ მიუღია, წერს სააგენტო.

ზელენსკიმ პარასკევს განაცხადა, რომ უკრაინასა და რუსეთს შორის ტექნიკური ხასიათის სამშვიდობო მოლაპარაკებები, სავარაუდოდ, არაბთა გაერთიანებულ საამიროებში გაიმართება, თუმცა აშშ-ს შეხვედრის თარიღი ჯერ არ შეუთავაზებია.

ევროპელი ოფიციალური პირების განცხადებით, ტრამპი და მისი გუნდი მზად იყვნენ, ზამთრის დადგომამდე უკრაინის მხარდაჭერის გაძლიერების თაობაზე ევროპის მოწოდებები მოესმინათ. მათი თქმით, ტრამპისა და ზელენსკის შეხვედრაც, ძირითადად, პოზიტიური იყო.

ტრამპს ჯერ არ გადაუწყვეტია, გაუგზავნის თუ არა უკრაინას ამ ზამთარში დამატებით საჰაერო თავდაცვის სისტემებსა და აღჭურვილობას. აშშ თავად განიცდის შეიარაღების დეფიციტს ირანთან მიმდინარე ომის გამო. ამასთან, ტრამპი უკრაინისთვის Patriot-ის რაკეტების წარმოების ლიცენზიების გადაცემას დათანხმდა.

ზელენსკის თქმით, ტრამპმა გადაწყვეტილება ამ საკითხთან დაკავშრებით მიმდინარე კვირაში უკვე მიიღო. თუმცა უკრაინის პრეზიდენტს მიწოდების კონკრეტულ ვადებზე დეტალები არ გაუჟღერებია.

Patriot-ის რაკეტების წარმოების დაწყებას, სავარაუდოდ, სულ მცირე ერთი წელი დასჭირდება, შესაბამისად, ეს გადაწყვეტილება უკრაინის გადაუდებელ საჭიროებას ვერ დააკმაყოფილებს — განსაკუთრებით ცივი თვეების განმავლობაში, როდესაც ქვეყანას რუსეთის იერიშებისგან კრიტიკული ინფრასტრუქტურის დაცვა სჭირდება.

ტრამპის შეთავაზება რუსეთში შეხვედრის გამართვის შესახებ იმავე კვირას გაკეთდა, როდესაც აშშ-ის სახელმწიფო მდივანმა მარკო რუბიომ განაცხადა, რომ ვაშინგტონმა პუტინი დეკემბერში, ფლორიდაში დაგეგმილ „დიდი ოცეულის“ სამიტზე მიიწვია.

ამ განცხადებას ევროპაში კრიტიკა მოჰყვა.

ევროკავშირის უმაღლესმა წარმომადგენელმა საგარეო პოლიტიკისა და უსაფრთხოების საკითხებში კაია კალასმა CNN-თან განაცხადა, რომ ეს გადაწყვეტილება „ძალიან მძიმე მოსასმენი იყო“.