The Wall Street Journal: ეგვიპტემ ისრაელი 2023 წლის 7 ოქტომბერს მოსალოდნელი თავდასხმის შესახებ წინასწარ გააფრთხილა

2023 წლის ოქტომბრის დასაწყისში ეგვიპტემ ისრაელი ღაზის სექტორიდან მოსალოდნელი თავდასხმის ნიშნების შესახებ ორჯერ გააფრთხილა, თუმცა ისრაელმა ეს გაფრთხილებები უყურადღებოდ დატოვა. სტატიას ამ შინაარსით The Wall Street Journal-ი ავრცელებს.

არაბული ქვეყნის მთავრობის წარმომადგენლების განცხადებით, ამის შემდეგ ეგვიპტის დაზვერვის ხელმძღვანელმა აბას ქამელმა ისრაელის პრემიერ-მინისტრ ბენიამინ ნეთანიაჰუს დაურეკა და კიდევ ერთი გაფრთხილება გადასცა.

რამდენიმე დღეში დაჯგუფება „ჰამასმა“ ისრაელზე მასშტაბური თავდასხმა მოაწყო, რომლის შედეგადაც დაახლოებით 1 200 ადამიანი დაიღუპა, დაახლოებით 250 კი მძევლად აიყვანეს. თავდასხმამ ღაზაში დამანგრეველი ომი გამოიწვია, რომელმაც ახლო აღმოსავლეთის პოლიტიკური და უსაფრთხოების გარემო მნიშვნელოვნად შეცვალა.

ქამელისა და ნეთანიაჰუს სატელეფონო საუბარი, რომლის შესახებაც აქამდე ინფორმაცია არ გავრცელებულა, ერთ-ერთია იმ არაერთ გაფრთხილებას შორის, რომელიც ნეთანიაჰუმ და ისრაელის სხვა მაღალჩინოსნებმა თავდასხმამდე მიიღეს. ამის შესახებ არაბული ქვეყნის მთავრობის წარმომადგენლები და საკითხზე ინფორმირებული სხვა პირები The Wall Street Journal-ს უყვებიან.

ამ ცნობებმა ისრაელში ოქტომბერში დაგეგმილი საპარლამენტო არჩევნების წინ კვლავ გაამძაფრა ყურადღება ნეთანიაჰუს ომამდელ მოქმედებებსა და იმაზე, თუ რამდენად შეიძლებოდა თავდასხმის თავიდან აცილება.

არაბი ოფიციალური პირებისა და საკითხზე ინფორმირებული ადამიანების განცხადებით, ნეთანიაჰუმ 2023 წლის სექტემბერში არაბთა გაერთიანებული საამიროების პრეზიდენტ მუჰამედ ბინ ზაიედთან სატელეფონო საუბრის დროსაც მიიღო ინფორმაცია „ჰამასის“ შესაძლო თავდასხმის ნიშნების შესახებ. მათი თქმით, ისრაელის ლიდერი, როგორც ჩანს, დარწმუნებული არ იყო ამ საფრთხის რეალობაში.

ოფიციალური პირების განცხადებით, გაფრთხილებებში თავდასხმის კონკრეტული დრო ან შესაძლო მასშტაბი მითითებული არ ყოფილა.

მანამდე ნეთანიაჰუს უარყოფილი აქვს ინფორმაცია, რომ 7 ოქტომბრის თავდასხმამდე პირადად მიიღო გაფრთხილება საამიროების მმართველისგან. ამის შესახებ პირველად ისრაელელმა ჟურნალისტებმა შლომი ელდარმა და რუთ იუვალმა წიგნში „მიტოვებისა და მედეგობის 843 დღე“ დაწერეს.

ისრაელში 7 ოქტომბრის თავდასხმიდან მალევე დაიწყო მსჯელობა იმაზე, ჰქონდა თუ არა ნეთანიაჰუს თავდასხმის თავიდან აცილების შესაძლებლობა. მას შემდეგ, რაც „ჰამასის“ ასობით მებრძოლი ღაზიდან სამხრეთ ისრაელში შეიჭრა, საკითხი ქვეყნის პოლიტიკაში ერთ-ერთ ყველაზე მწვავე თემად იქცა.

ნეთანიაჰუ ეწინააღმდეგება დამოუკიდებელი საგამოძიებო კომისიის შექმნას, რომელმაც უნდა შეისწავლოს მისი მთავრობის პასუხისმგებლობა თავდასხმის წინ არსებულ ჩავარდნებზე. პრემიერ-მინისტრი აცხადებს, რომ ასეთ კომისიას ქვეყნის უზენაესი სასამართლო არ უნდა აკონტროლებდეს, რადგან, მისი შეფასებით, სასამართლო მის მიმართ მიკერძოებულია.

ამასთან, გამოკითხვების თანახმად, ისრაელის მოსახლეობის დიდი უმრავლესობა დამოუკიდებელი გამოძიების ჩატარებას უჭერს მხარს.

27 ოქტომბერს დაგეგმილი საპარლამენტო არჩევნების მოახლოებასთან ერთად, 7 ოქტომბრის თავდასხმასთან დაკავშირებულ ჩავარდნებზე ნეთანიაჰუს პასუხისმგებლობის საკითხი საარჩევნო კამპანიის ერთ-ერთ მთავარ თემად კვლავ იქცა, - წერს გამოცემა.