AXIOS: თეირანის შეთავაზების უარყოფის მიუხედავად, ტრამპი ირანთან მოლაპარაკებების განახლებას მიმდინარე კვირას ელოდება

აშშ-ის პრეზიდენტმა დონალდ ტრამპმა AXIOS-ს განუცხადა, რომ ირანთან მოლაპარაკებების კიდევ ერთი რაუნდის გამართვას ამ კვირაში ელოდება, მიუხედავად იმისა, რომ ერთი დღის წინ თეირანის მიერ ომის დასრულების მიზნით შეთავაზებული წინადადება უარყო.

კატარი და სხვა რეგიონული შუამავლები აშშ-სა და ირანს შორის მოლაპარაკებების განახლებას ცდილობენ, თუმცა მხარეებს შორის ძირითად საკითხებზე მნიშვნელოვანი უთანხმოება კვლავ რჩება, - წერს გამოცემა.

ირანი მოლაპარაკებების ფარგლებში ძირითადად ჰორმუზის სრუტესა და აშშ-ის მიერ დაწესებულ საზღვაო ბლოკადაზე ამახვილებს ყურადღებას მაშინ, როდესაც ტრამპის ადმინისტრაცია თეირანისგან ბირთვულ პროგრამასთან დაკავშირებით დათმობებს ითხოვს.

რეგიონის ორმა წყარომ AXIOS-ს განუცხადა, რომ ისინი აშშ-სა და ირანს შორის არაპირდაპირი მოლაპარაკებების ახალ რაუნდს შესაძლოა უკვე ორშაბათს ელოდებიან. თუმცა უცნობია, შეძლებენ თუ არა მხარეები არსებული უთანხმოებების დაძლევას.

„ამ კვირაში ირანთან კიდევ მეტ მოლაპარაკებას ველოდები. მათ შეთანხმების მიღწევა სურთ, მაგრამ ეს არ არის ის შეთანხმება, რომლის დადებაც მე მინდა. ეს არის ის, რაზეც შესაძლოა ერთი წლის წინ დავთანხმებულიყავით. მათ შესაძლებლობები გადაჭარბებულად შეაფასეს“, - განუცხადა ტრამპმა AXIOS-ს სატელეფონო ინტერვიუში.

კითხვაზე, განიხილავს თუ არა ირანზე დარტყმების განახლებას, ტრამპმა უპასუხა: „ამაზე ყოველთვის ვფიქრობ“.

ტრამპის განცხადებით, ამავდროულად, აშშ-ის სამხედროები ჰორმუზის სრუტიდან ნავთობის დიდი მოცულობის გატანას უზრუნველყოფენ.

მისი თქმით, გასულ შაბათ-კვირას სრუტეში ომის დაწყების შემდეგ ნავთობის ყველაზე დიდი მოცულობა გადაიზიდა - „20 მილიონ ბარელზე მეტი“. აშშ-ის თავდაცვის უწყების წარმომადგენელმა დაადასტურა, რომ პარასკევს ღამით, ჰორმუზის სრუტის გავლით, 22 მილიონი ბარელი ნავთობის ექსპორტი განხორციელდა.

როგორც AXIOS-ი წერს, გასულ სამშაბათს, ნიუ-იორკში გაეროს გენერალური ასამბლეის ფარგლებში, აშშ-ის პრეზიდენტის სპეციალურმა წარმომადგენლებმა სტივ უიტკოფმა და ჯარედ კუშნერმა ირანის საგარეო საქმეთა მინისტრ აბას არაღჩისთან არაპირდაპირი მოლაპარაკებების ახალი რაუნდი გამართეს.

მოლაპარაკებებში კატარის წარმომადგენლებიც მონაწილეობდნენ. არაღჩიმ უიტკოფსა და კუშნერს ჰორმუზის სრუტის გასახსნელად და ბირთვული მოლაპარაკებების განახლებისთვის ირანის პირობები გააცნო.

ირანმა ამერიკულ მხარეს შესთავაზა, რომ აშშ-ის მიერ საზღვაო ბლოკადის მოხსნის, ნავთობის გაყიდვაზე სანქციების გაუქმებისა და რეგიონში ცეცხლის შეწყვეტის აღდგენის შემთხვევაში, ჰორმუზის სრუტეს ერთი კვირის განმავლობაში გახსნიდა და ბირთვულ მოლაპარაკებებს განაახლებდა. ტრამპმა ეს წინადადება უარყო.

თუმცა აშშ-ის ერთმა მაღალჩინოსანმა და რეგიონის ორმა წყარომ AXIOS-ს განუცხადეს, რომ კატარის შუამავლები შეთანხმების მისაღწევად დიპლომატიურ მოლაპარაკებებს კვლავ განაგრძობენ.

ხუთშაბათს კატარის პრემიერ-მინისტრი ნიუ-იორკში ირანის პრეზიდენტს შეხვდა და ტრამპის ადმინისტრაციასთან შესაძლო შეთანხმება განიხილა. ამის შემდეგ კატარის მაღალჩინოსნები უიტკოფს შეხვდნენ და მოლაპარაკებების შესახებ ინფორმაცია მიაწოდეს.