AXIOS: ტრამპის ეროვნული უსაფრთხოების გუნდის მაღალჩინოსნებმა კემპ დევიდში ირანისა და იემენის შესახებ საიდუმლო შეხვედრა გამართეს

აშშ-ის პრეზიდენტის დონალდ ტრამპის ადმინისტრაციის უმაღლესი რანგის წარმომადგენლები პარასკევს კემპ დევიდში რამდენიმე საათით საიდუმლოდ შეიკრიბნენ, რათა ირანთან ომისა და იემენში საუდის არაბეთსა და „ჰუსიტებს“ შორის კონფლიქტის ფონზე სამომავლო ნაბიჯები განეხილათ. ინფორმაციას AXIOS-ი აშშ-ის სამ ოფიციალურ პირზე დაყრდნობით ავრცელებს.

შეხვედრა უჩვეულო იყო, რადგან ტრამპის ადმინისტრაციას ის საჯაროდ არ გამოუცხადებია. მსგავსი შეხვედრა ბოლოს 2025 წლის ივნისში, ისრაელსა და ირანს შორის ომის დაწყებამდე რამდენიმე დღით ადრე გაიმართა.

შეხვედრას ვიცე-პრეზიდენტი ჯეი დი ვენსი ხელმძღვანელობდა. მოლაპარაკებების მონაწილეებს შორის იყვნენ: სახელმწიფო მდივანი მარკო რუბიო; თავდაცვის მდივანი პიტ ჰეგსეტი; თეთრი სახლის სპეციალური წარმომადგენელი სტივ უიტკოფი;
აშშ-ის ცეტრალური სადაზვერვო სააგენტოს (CIA) დირექტორი ჯონ რეტკლიფი; აშშ-ის შეიარაღებული ძალების გაერთიანებული შტაბების უფროსი, გენერალი დენ კეინი.

„გადაწყვეტილებები მიიღეს ან საკითხები, სულ მცირე, სიღრმისეულად განიხილეს“, - განაცხადა ერთ-ერთმა ამერიკელმა მაღალჩინოსანმა ახლო აღმოსავლეთში არსებული კრიზისის შესახებ.

თეთრმა სახლმა შეხვედრასთან დაკავშირებით კომენტარის გაკეთებაზე უარი თქვა.

როგორც AXIOS-ი იუწყება, მოლაპარაკებების ჩიხში შესვლის ფონზე, პრეზიდენტი დონალდ ტრამპი ირანში ფართომასშტაბიანი სამხედრო ოპერაციების განახლებას განიხილავს. „ახლა გადაწყვეტილება უნდა მივიღო: ან ირანი ხელს მოაწერს შეთანხმებას, ან ის აღარ იარსებებს“, - განაცხადა ტრამპმა.

ამავდროულად, ტრამპს სთხოვენ, შეუერთდეს საუდის არაბეთის მიერ იემენში „ჰუსიტების“ წინააღმდეგ დაგეგმილ სამხედრო ოპერაციას.