ჩეხეთში სირიელი ქურთების ლიდერის გათავისუფლებას ოფიციალური ანკარა აპროტესტებს

ჩეხეთის სასამართლოს მიერ, სირიის მოქალაქის და ქურთების პარტიის ლიდერის სალეჰ მუსლიმის გათავისუფლებას ოფიციალური ანკარა აპროტესტებს. თურქეთი ამ ნაბიჯს, როგორც პოლიტიკური გადაწყვეტილებასა და ტერორისტული ორგანიზაციის ღია მხარდაჭერას, ისე აფასებს. ამის შესახებ BBC წერს.

თურქეთის მთავრობის პრესსპიკერის, განცხადებით, სასამართლოს განჩინება საერთაშორისო სამართლის ნორმების დარღვევაცაა და ნეგატიურ გავლენას იქონიებს თურქეთ-ჩეხეთის ურთიერთობებზე.

თურქეთი სალეჰ მუსლიმს მას შემდეგ ეძებდა, რაც თურქულმა სასამართლომ ქურთ პოლიტიკოსს ბრალი სახელმწიფოს ერთიანობისთვის საფრთხის შექმნაში დასდო.

სალეჰ მუსლიმი შაბათს პრაღაში აიყვანეს. სირიის მთავარი ქურთული პოლიტიკური პარტიის განცხადებით კი, მათი ლიდერი პრაღაში თურქეთის მოთხოვნით დააკავეს. პარტიის განცხადებით, მათი ლიდერი სირიის სრულუფლებიანი მოქალაქეა და ევროპაში ოფიციალური ვიზიტით იმყოფებოდა.

ჩეხეთის სასამართლომ დაკავებული ქურთი პოლიტიკოსი თურქეთის მოწოდებების მიუხედავად,  დარბაზიდან გაათავისუფლა. ოფიციალური ანკარა ითხოვდა, სასამართლოს სალეჰ მუსლიმისთვის აღკვეთის ღონისძიების სახით წინასწარი პატიმრობა შეეფარდებინა, სადაც ის თურქეთში ექსტრადიციას დაელოდებოდა.

ქურთული პარტიის განცხადებაში ნათქვამია, რომ თურქეთის სახელმწიფო უკანონოდ ითხოვს ადამიანების დაკავებას, რომლებიც არ არიან მათი მოქალაქეები და „შესაბამისად, თურქეთს მათი დაპატიმრების მოთხოვნის უფლება არ აქვს“.

მუსლიმმა ქურთთა დემოკრატიული კავშირის პარტია 2003 წელს დააარსა. 2013-2017 წლებში ის პარტიის თავმჯდომარე იყო.

ბოლო რამდენიმე კვირის განმავლობაში ის ევროპის ქვეყნებში ოფიციალურ პირებს ხვდებოდა და ცდილობდა, მათი ყურადღება სირიაში თურქების მიერ ჩადენილ დანაშაულზე მიეპყრო.

ცოტა ხნის წინ თურქეთის პრეზიდენტმა, რეჯეფ თაიფ ერდოღანმა სირიაში ქალაქ აფრინის აღების პირობა დადო.  იქამდე, თურქეთის ავიაციამ აფრინის რაიონში ქურთთა პოზიციები დაბომბა. 

15 იანვარს, თურქეთის პრეზიდენტმა რეჯეფ თაიფ ერდოღანმა სირიის სასაზღვრო ძალებს ტერორისტული არმია უწოდა და აღნიშნა, რომ სრულ დაკომპლექტებამდე აღნიშნულ სამხედრო ფორმირებას თურქეთი გაანეიტრალებს. 

20 იანვარს, თურქეთის ავიაციამ სირიის ჩრდილოეთ ნაწილში, აფრინის რაიონში ქურთთა პოზიციები დაბომბა. თურქეთის ავიაციამ 108 სამიზნე ობიექტზე მიიტანა იერიში, მათ შორის, აეროდრომზე, რომლითაც აშშ ქურთებს იარაღით ამარაგებდა.

22 იანვარს, ერდოღანმა განაცხადა, რომ თურქეთის შეირაღებული ძალები აფრინში ოპერაციას უახლოეს დროში დაასრულებენ.