აშშ-ის თავდაცვის მდივანი სირიაზე თავდასხმას არ გამორიცხავს

ამერიკის შეერთებული შტატების თავდაცვის მინისტრმა გააფრთხილა სირიის რეჟიმი და "დიდი უგუნურება“ უწოდა სამთავრობო ჯარების მიერ საბრძოლო აირების გამოყენებას. ინფორმაციას რადიო თავისუფლება ავრცელებს.

ჯეიმს მატისმა ეს კომენტარი იმ ჟურნალისტებთან საუბრისას გააკეთა, რომლებიც პენტაგონის ხელმძღვანელთან ერთად ომანში იმყოფებიან. მატისმა ასევე გააკრიტიკა რუსეთი ბაშარ ალ ასადის დახმარებისთვის.

აშშ-ის თავდაცვის მინისტრმა ისიც განაცხადა, რომ აშშ-ის პრეზიდენტ დონალდ ტრამპს აქვს სრული შესაძლებლობა იმისა, რომ “სირიასთან დაკავშირებით მიიღოს ის გადაწყვეტილება, რასაც საჭიროდ ჩათვლის“.

2017 წლის აპრილში დონალდ ტრამპმა სირიის სამთავრო ძალების საავიაციო ბაზის დაბომბვის ბრძანება გასცა მას შემდეგ რაც, ნერვულ-პარალიზებადი მოქმედების გაზის ზარინის გამოყენებით განხორციელებული იერიშის შედეგად 70-მდე მშვიდობიანი მოქალაქე დაიღუპა ოპოზიციის მიერ კონტროლირებად ქალაქ ხან-შეიხუნში. 

24 თებერვალს ცნობილი გახდა, რომ აღმოსავლეთ ღუტაში ქიმიური თავდასხმა მოხდა.

გაეროს უშიშროების საბჭომ სირიაში ცეცხლის შეწყვეტის 30-დღიანი რეჟიმის გამოცხადების შესახებ რეზოლუცია 24 თებერვალს მიიღო, თუმცა შეთანხმება მიღებიდან რამდენიმე საათში დაირღვა. 

თავის მხრივ, რუსეთის პრეზიდენტმა სირიაში ჰუმანიტარული პაუზის ამოქმედების განკარგულება გასცა. რეგიონში ჰუმანიტარული დახმარების მიწოდების უზრუნველყოფაზე ვლადიმერ პუტინმა, ანგელა მერკელმა და ემანუელ მაკრონმა იმსჯელეს. 

აღმოსავლეთ ღუტა ერთ-ერთი ბოლო ტერიტორიაა, რომელსაც მეამბოხეები აკონტროლებენ. ქალაქი 4 წელზე მეტია ალყაში იმყოფება. ამ რეგიონში 400 000-მდე ადამიანი ცხოვრობს, რომლებსაც ჰუმანიტარული დახმარება სჭირდება.