აშშ-ში ყოფილი მოსამართლე კონსტიტუციის შეცვლის ინიციატივით გამოდის

ამერიკის უზენაესი სასამართლოს ყოფილი მოსამართლე ჯონ პოლ სტივენსი წინადადებით გამოდის, რომ ამერიკის კონსტიტუციიდან მეორე დამატება ამოიღონ, რომელიც ამერიკის მოქალაქეებს იარაღის ყიდვის და ფლობის უფლებას აძლევს. ამის შესახებ ამერიკის ხმა წერს.

სტივენსის აზრით, ეს გადაწყვეტილება ქვეყანაში იარაღით ჩადენილი მასობრივი მკვლელობების აღსაკვეთად გადადგმული დიდი ნაბიჯი იქნება.

97 წლის ყოფილმა მოსამართლემ, რომელიც 2010 წელს პენსიაში გასვლამდე ამერიკის უზენაეს სასამართლოში 35 წელი მსახურობდა, გაზეთ “ნიუ-იორკ თაიმსში” გამოქვეყნებულ სტატიაში თქვა, რომ კონსტიტუციიის მეორე დამატების “თავიდან მოშორება” “შაშხანების ეროვნულ ასოციაციას შეასუსტებს საკანონმდებლო პროცესში ჩარევის და იარაღის კონტროლის კონსტრუქციული კანონის მიღების თვალსაზრისით.”

სტივენსი 2008 წელს უზენაეს სასამათლოში უმცირესობაში აღმოჩნდა, როცა ქვეყნის უმაღლესი ინსტანციის სასამართლომ გადაწყვეტილება მიიღო, რომ კონსტიტუციის მეორე დამატება ამერიკის მოქალაქეებს იარაღის თავდაცვის მიზნით ქონის უფლებას აძლევდა. სტივენსის თქმით, ამ გადაწყვეტილებამ “შაშხანების ეროვნულ ასოციაციას უდიდესი ძალის მქონე პროპაგანდის იარაღი ჩაუგდო ხელში.”

პრეზიდენტი დონალდ ტრამპი სტივენსის მოსაზრებას გამოეხმაურა და დიდი ასოებით დაწერა, რომ “მეორე დამატება არასოდეს გაუქმდება!”

ამერიკაში მსროლელთა ეროვნული ასოციაცია იარაღზე კონტროლის გამკაცრებას არ ეთანხმება. ამერიკის "მსროლელთა ეროვნული ასოციაციის" ხელმძღვანელი, ვეინ ლაპიერი დემოკრატებსა და ამერიკულ მედიას 14 თებერვლის ტრაგედიით მანიპულირებაში ადანაშაულებს.

აშშ-ში იარაღის ტარება კონსტიტუციის მეორე შესწორებითაა გარანტირებული, თუმცა მისი ტარების წესები სხვადასხვა შტატში განსხვავებულია.

იარაღის კანონის გამკაცრების მოთხოვნასთან დაკავშირებით აქციები ფლორიდის სკოლაზე თავდასხმის შემდეგ დაიწყო. 

ნიკოლას კრუზმა პარკლენდის სკოლაში ცეცხლი 14 თებერვალს გახსნა. თავდამსხმელმა სკოლის შენობაში შესვლამდე 3 ადამიანი მოკლა, შენობის შიგნით - 12. ორი დაჭრილი მოგვიანებით საავადმყოფოში გარდაიცვალა.