მაიკ პომპეო: აშშ რუსეთის ექსპანსიასთან მებრძოლი საქართველოს შეიარაღებას განაგრძობს

აშშ განაგრძობს რუსეთის ექსპანსიონიზმთან მებრძოლი საქართველოს შეიარაღებას,-  ამის შესახებ აშშ-ის სახელმწიფო მდივნის პოსტზე წარდგენილი მაიკ პომპეოს სიტყვაშია ნათქვამი, რომლითაც დღეს ის სენატში წარდგება.

„აშშ იარაღს აწვდის რუსეთის ექსპანსიონიზმთან მებრძოლ მამაც კაცებს და ქალებს საქართველოსა და უკრაინაში“, – ნათქვამია მაიკ პომპეოს გამოსვლის ტექსტში, რომელსაც 1tv, Associated Press​-ზე დაყრდნობით ავრცელებს. 

პომპეო დღეს კონგრესში გამოსვლისას განაცხადებს, რომ აშშ-ის რბილი პოლიტიკა რუსეთის მიმართ დასრულებულია.

„რუსეთი განაგრძობს აგრესიას და ეს აშშ-ის მრავალწლიანი რბილი პოლიტიკის დამსახურებაა. ახლა ეს პოლიტიკა დასრულდა“, – ნათქვამია პომპეოს სიტყვაში.

სენატში გამოსვლისას აშშ-ის სადაზვერვო სააგენტოს ყოფილი უფროსი ჩამოთვლის იმ ნაბიჯებს, რომელსაც ტრამპის ადმინისტრაცია რუსეთის აგრესიის საპასუხოდ დგამს. მათ შორის არის „აშშ-ის მიერ დაწესებული მკაცრი სანქციები, დიპლომატების გაძევება, აშშ-ის სამხედრო პოტენციალის გაზრდა, ბირთვული არსენალის მოდერნიაზაცია და რუსეთის ექსპანსიასთან მებრძოლი საქართველოსა და უკრაინის შეიარაღება“.

აშშ-ის სახელმწიფო მდივანი რექს ტილერსონი თანამდებობიდან 13 მარტს მოხსნეს. მაშინვე ცნობილი გახდა, რომ მის ადგილს ცენტრალური დაზვერვის სააგენტოს (CIA) დირექტორი მაიკ პომპეო დაიკავებდა. 

პრეზიდენტ დონალდ ტრამპის თქმით, პომპეო "ფანტასტიკურად გაუმკლავდება" თავის მოვალეობებს ახალ თანამდებობაზე. მან მადლობა გადაუხადა ტილერსონს გაწეული სამუშაოსთვის, ასევე დაასახელა CIA-ს ახალი ხელმძღვანელიც. აშშ-ის ცენტრალური დაზვერვის სააგენტოს ხელმძღვანელი ჯინა ჰესპელი იქნება, რომელიც პირველი ქალია, ვინც დაზვერვის უწყებას უხელმძღვანელებს.