ბინ ლადენის „გამცემი“ ექიმი პაკისტანის ციხიდან საიდუმლო ადგილას გადაიყვანეს

პაკისტანელი ექიმი შაკილ აფრიდი, რომელიც ამერიკულ დაზვერვას ტერორისტის, ბინ ლადენის მოძებნაში დაეხმარა, პაკისტანში პაშვარიის ციხიდან "უცნობ უსაფრთხო ადგილას" გადაიყვანეს. ამის შესახებ სააგენტო "ფრანს პრესი" დაკავებულის ოჯახზე დაყრდნობით ავრცელებს. 

სიტუაციასთან დაახლოებულმა პირმა ადრე რუსულ გამოცემას განუცხადა, რომ შაკილ აფრიდი, რომლის გათავისუფლების მიღწევაც სურს დონალდ ტრამპს, პაშვარიდან სხვა ციხეში დაგეგმილი გაქცევის გამო გადაიყვანეს. 

2011 წელს, ბინ ლადენის ლიკვიდაციის შემდეგ, ამერიკული მედია წერდა, რომ ეს წარმატება აფრიდის დამსახურება იყო: ექიმი CIA-ს დავალებით, შეიჭრა სახლში, სადაც სავარაუდოდ ცხოვრობდა "ალ ქაიდას" ლიდერი" და ვაქცინაციის მოგონილი მიზეზით, ტერორისტის ოჯახის წევრების დნმ-ანალიზის ნიმუშები აიღო. 

სპეცოპერაცია ამერიკულმა მხარემ პაკისტანის ხელისუფლების გაფრთხილების გარეშე ჩაატარა, რამაც ისლამაბადის მხრიდან უკმაყოფილება გამოიწვია. აფრიდი 2011 წლის მაისში დააკავეს და სამშობლოს ღალატში დასდეს ბრალი. თავიდან 33 წლის თავისუფლების აღკვეთა მიუსაჯეს, შემდგომ კი ვადა 23 წლამდე შეუმცირეს. 

ტრამპი წინასაარჩევნო კამპანიის დროს აცხადებდა, რომ აფრიდის გათავისუფლებისთვის მას ორი წუთი დასჭირდება, თუმცა ის დღემდე პატიმრობაშია.