ზემანმა აღიარა, რომ „ნოვიჩოკს“ ჩეხეთში აწარმოებდნენ

მომწამვლელი ნივთიერება А230 2017 წლის ნოემბერში მცირე ოდენობით ჩეხეთის ქალაქ ბრნოში მდებარე თავდაცვის სამინისტროს სამეცნიერო-კვლევით ინსტიტუტშიც აწარმოეს. ის გამოსცადეს კიდეც და მალევე გაანადგურეს. ამის შესახებ ჩეხეთის პრეზიდენტმა მილოშ ზემანმა სამოქალაქო კონტრდაზვერვასა და სამხედრო დაზვერვაზე დაყრდნობით განაცხადა. ინფორმაციას Star Tribune-ი ავრცელებს.

მანამდე ეს ცნობა რუსეთის ფედერაციის საგარეო საქმეთა სამინისტრომ გაავრცელა, რის საფუძველზეც ზემანმა მისი გადამოწმება უსაფრთხოების და ინფორმაციის სამსახურს დაავალა.

ზემანის ეს განცხადება TV Barrandov-ის ეთერში გადაიცა.

პრეზიდენტის განცხადებით, სამხედრო ისტორიის ინსტიტუტი და ასევე ბირთვული უსაფრთხოების სამსახური ამტკიცებს, რომ ეს ნივთიერება „ნოვიჩოკის“ კლასის სრულად არ იყო და ერთგვარად განსხვავდებოდა მისგან.

„ამასთან, მივიღე დოკუმენტი სამხედრო დაზვერვიდან, სადაც აშკარად ნათქვამია, რომ ნივთიერება А230 „ნოვიჩოკია“. ვინაიდან ამ თემასთან სამხედრო დაზვერვა უფრო ახლოსაა, ვიდრე სამოქალაქო კონტრდაზვერვა, გამოვიტანე დასკვნა, რომ ჩვენთან მცირე ოდენობით „ნოვიჩოკი“ დამზადდა და გამოიცადა, შემდეგ კი განადგურდა. ვიცით, სად და როდის მოხდა ეს და ფარისევლობა იქნებოდა თავი მოგვეჩვენებინა, რომ მსგავსი არაფერი ყოფილა“, თქვა ზემანმა.

სერგეი სკრიპალი და მისი შვილი იულია 4 მარტს დიდი ბრიტანეთის ქალაქ სოლსბერის სავაჭრო ცენტრში უგონო მდგომარეობაში იპოვეს და საავადმყოფოში გადაიყვანეს. ამჟამად მამა-შვილი თავს კარგად გრძნობს.

სერგეი და იულია სკრიპალების მოწამვლის შემდეგ ტერეზა მეიმაც გააკეთა განმარტება და რუსი ჯაშუშის ნერვულ-პარალიტიკური ნივთიერებით მოწამვლაში რუსეთი დაადანაშაულა. 

ლონდონი ირწმუნება, რომ სკრიპალების მოსაწამლად „ნოვიჩოკი“ გამოიყენეს.