G7-ის ლიდერები და ევროკავშირი ვენესუელის არჩევნების შედეგებს არ აღიარებენ

დიდი შვიდიანის წევრი ქვეყნების ლიდერები და ევროკავშირი ერთობლივ კომუნიკეში ვენესუელას არჩევნების შედეგებს არ აღიარებენ და მიიჩნევენ, რომ  ამ არჩევნებს არ აქვს ნდობა და ლეგიტიმაცია.

“ჩვენ, „დიდი შვიდიანის“ - კანადის, საფრანგეთის, გერმანიის, იტალიის, იაპონიის, ბრიტანეთის, აშშ-ის - ლიდერები და ევროკავშირი ვერთიანდებით საარჩევნო პროცესის მიუღებლობაში, რომელმაც 2018 წლის 20 მაისს პრეზიდენტის არჩევნებამდე მიგვიყვანა. საერთაშორისო სტანდარტების და ინკლუზიური, სამართლიანი და დემოკრატიული გარანტიების უზრუნველყოფის მიუღებლობის გამო, ამ არჩევნებს არ აქვს ნდობა და ლეგიტიმაცია“, - ნათქვამია ერთობლივ განცხადებაში, რომლის ავტორების აზრით, შედეგი მოქალაქეების ნებას არ გამოხატავს.

განცხადებაში ასევე არის მოწოდება, რომ ხელისუფლებამ დაგეგმოს თავისუფალი და სამართლიანი არჩევნები, აღადგინოს ნაციონალური კრება და უზრუნველყოს ჰუმანიტარულ ორგანიზაციებთან უსაფრთხო და შეუფერხებელი წვდომა.

ნიკოლას მადურო ვენესუელის პრეზიდენტად მეორე ვადით აირჩიეს. არჩევნების შედეგების გამოცხადების შემდეგ აშშ-მა ვენესუელას სანქციები დაუწესა

მადურო, რომელიც უგო ჩავესის მმართველობის დროს ვიცეპრეზიდენტის პოსტს იკავებდა, მთავრობის სათავეში 2013 წლის მარტში, ჩავესის გარდაცვალების შემდეგ მოვიდა.

იმავე წლის აპრილში კი უკვე არჩევნებში გამარჯვებით მან ვენესუელის პრეზიდენტის პოსტი ოფიციალურად დაიკავა.

გასული წლის დეკემბერში, მადურომ განაცხადა, რომ  მომდევნო წლის საპრეზიდენტო არჩევნებში ოპოზიცია მონაწილეობას ვერ მიიღებდა. განცხადების მიხედვით, გადაწყვეტილება პრეზიდენტმა მას შემდეგ მიიღო, რაც მანამდე ოპოზიციურმა პარტიებმა მუნიციპალურ არჩევნებს ბოიკოტი გამოუცხადეს.