ინდოელი, რომელიც ველოსიპედით ჩემპიონატზე მიდიოდა, საქართველოში არ შემოუშვეს

კლიფინ ფრანცისმა და მისმა მეგობარმა გადაწყვიტეს, რუსეთში მსოფლიო ჩემპიონატზე დასასწრებად და ლიონელ მესის სანახავად მოსკოვში ველოსიპედით ჩასულიყვნენ. მოგზაურობა 23 თებერვალს დაიწყო. მათ შესახებ BBC წერს.

ისინი ჯერ დუბაიში ჩაფრინდნენ, იქიდან კი ველოსიპედებით მოსკოვისკენ გაემგზავრნენ. მათ 4200 კილომეტრი უნდა გაევლოთ.

როგორც ფრანცისი ამბობს, მათ უპრობლემოდ მიაღწიეს აზერბაიჯანამდე, თუმცა აზერბაიჯანის საზღვარზე პოლიციელებმა გააჭიანურეს მათი პირადი დოკუმენტების შემოწმება. ფრანცისის თქმით, მოგზაურობისას მან წონაში ძალიან დაიკლო: "ისე აღარ გამოვიყურებოდი, როგორც პასპორტის ფოტოზე, მაგრამ ისინი კეთილგანწყობილები იყვნენ ჩემ მიმართ".

როდესაც კლიფინ ფრანცისმა საქართველოს საზღვარს მიაღწია, გეგმების შეცვლა მოუხდა. ქართველმა მესაზღვრეებმა მას შემოსვლაზე უარი უთხრეს: "ყველა საბუთი წესრიგში მქონდა, მაგრამ ქვეყანაში შესვლაზე უარი მითხრეს", - ამბობს ფრანცისი და დასძენს, რომ აზერბაიჯანში გადასვლასაც ვეღარ ახერხებდა, რადგან აზერბაიჯანის ერთჯერადი ვიზა ჰქონდა. 

საბოლოოდ, კლიფინ ფრანცისი და მისი მეგობარი რუსეთში აზერბაიჯანი-დაღესტნის საზღვრიდან შევიდნენ.

BBC-ის ცნობით, ფრანცისი და მისი მეგობარი ახლა ქალაქ ტამბოვში არიან, რომელიც მოსკოვიდან 460 კილომეტრის დაშორებით მდებარეობს.