უკრაინაში „დიდი შვიდიანის“ ელჩები სენცოვის გათავისუფლებას ითხოვენ

უკრაინაში „დიდი შვიდიანის“ წევრი სახელმწიფოების ელჩებმა გამოაქვეყნეს ერთობლივი მიმართვა, რომელშიც ღრმა შეშფოთება გამოთქვეს ოლეგ სენცოვის და რუსეთში მყოფი სხვა უკრაინელი პატიმრების მდგომარეობის გამო. ამის შესახებ რადიო თავისუფლება წერს.

„მათი გათავისუფლება, როგორც დაკავებულთა ფართო, ორმხრივი გაცვლის ნაწილი იქნებოდა ჰუმანიტარული თვალსაზრისით მნიშვნელოვანი, წინგადადგმული ნაბიჯი“ - ნათქვამია კანადის, აშშ-ის, დიდი ბრიტანეთის, გერმანიის, საფრანგეთის, იტალიის და იაპონიის ელჩების ერთობლივ განცხადებაში.

20 ივნისს, „ნოვაია გაზეტასთან“ ინტერვიუში რუსეთის დუმის სრულუფლებიანმა წარმომადგენელმა ადამიანის უფლებების საკითხებში, ტატიანა მოსკალკოვამ ოლეგ სენცოვის შიმშილობა შეადარა „სამკურნალო შიმშილობას“ და განაცხადა, რომ სენცოვს მისი თანხმობით უტარდება თერაპია ვიტამინების და გლუკოზის გამოყენებით.

ოლეგ სენცოვის გათავისუფლების მოთხოვნით აქციები რამდენჯერმე გაიმართა მოსკოვსა და ევროპის ქალაქებში. ასევე, აშშ-ის პენცენტრი, აშშ-ის საგარეო უწყება რუსეთის პრეზიდენეტს ვლადიმერ პუტინს უკრაინელი რეჟისორის ოლეგ სენცოვის გათავისუფლებას სთხოვს, რომელსაც ტერორიზმის ბრალდებით 20-წლიანი პატიმრობა აქვს მისჯილი. ოლეგ სენცოვი ბრალს არ აღიარებს და 1 თვეა შიმშილობს. ოლეგ სენცოვმა შიმშილობა 16 მაისს გამოაცხადა. 

რეჟისორი სასჯელს ქალაქ ლაბიტნანგის კოლონიაში იხდის. რუსეთის სპეცსამსახურების თანამშრომლებმა უკრაინელი რეჟისორი ოლეგ სენცოვი 2014 წლის მაისში დააკავეს ანექსირებულ ყირიმში და ბრალად დასდეს ტერაქტების ორგანიზება. 2015 წლის აგვისტოში, დონის როსტოვის სასამართლომ სენცოვს 20 წლით პატიმრობა მიუსაჯა. უკრაინელი რეჟისორი პოლიტპატიმრად აღიარა უფლებადამცველმა ორგანიზაცია „მემორიალმა.“