მერკელი და ორბანი ერთმანეთს მიგრანტების გამო დაუპირისპირდნენ

გერმანიის კანცლერი და უნგრეთის პრემიერმინისტრი ერთმანეთს მიგრანტების საკითხის გამო დაუპირისპირდნენ. ამის შესახებ სააგენტო Reuters-ი წერს.

გავრცელებული ინფორმაციით, ბერლინში გამართულ კონფერენციაზე ანგელა მერკელმა და ვიქტორ ორბანმა მწვავედ იკამათეს. „ჩვენ არ უნდა დაგვავიწყდეს, რომ საუბარია ადამიანებზე, რომლებიც ჩვენთან დახმარებისთვის მოდიან და უნდა ვხელმძღვანელობდეთ ადამიანური ღირებულებებით. ჰუმანურობა ევროპის სულია და თუ ევროპას თავისი სულის შენარჩუნება სურს, თვალი არ უნდა დახუჭოს ადამიანების ტანჯვაზე,“-განაცხადა კონფერენციაზე ევროპის საიმიგრაციო პოლიტიკასთან დაკავშირებით ორბანის კრიტიკული პოზიციის გამო აღშფოთებულმა მერკელმა.

უნგრეთის პრემიერს გერმანიის კანცლერის განცხადება რეპლიკის გარეშე არ დაუტოვებია. ვიქტორ ორბანმა აღნიშნა, რომ თუ ევროპას ჰუმანურობის გამოჩენა სურს, კონტინენტზე ლტოლვილების ნაკადის შესვლის მასტიმულირებელი მიზეზები უნდა აღმოფხვრას.

„თუ ის დახმარება, რომელსაც ევროპა მიგრანტებს სთავაზობს, აფრიკასა და აზიაში ადამიანებს აფიქრებინებს, რომ ევროპაში უნდა გადმოვიდნენ, ისინი აუცილებლად გადმოვლენ. ჩვენ უნდა ვიყოთ ჰუმანურები და ამ ქვეყნებს უნდა დავეხმაროთ, თუმცა სიტუაცია არ უნდა დავამძიმოთ და საზღვრები უნდა ჩავკეტოთ,“-აღნიშნა ორბანმა.

29 ივნისს ევროკავშირის სამიტზე წევრი სახელმწიფოების ლიდერებმა საიმიგრაციო კრიზისთან დაკავშირებით ერთობლივ პოლიტიკაზე შეთანხმება მოახერხეს. 

შეთანხმების ერთ-ერთი პუნქტი შეეხება ზღვაზე გადარჩენილი მიგრანტებისთვის ცენტრების გახსნას ევროკავშირის იმ ქვეყნებში, რომლებიც ამას დათანხმდებიან. გარდა ამისა, ევროკავშირი აპირებს ჩრდილოეთ აფრიკის ერთ-ერთ ქვეყანაში გახსნას ლტოლვილთა ბანაკი, რათა შეამციროს ხმელთაშუა ზღვის გავლით ევროპისკენ მიმავალი მიგრანტების ნაკადი. ჯერჯერობით უცნობია, რომელი ქვეყნები დათანხმდებიან ლტოლვილებისთვის ბანაკების გახსნას. ცნობილია, რომ გასულ კვირას მაროკომ ამ ინიციატივაზე უარი თქვა.

ლიდერები ასევე შეთანხმდნენ, რომ საზღვრების კონტროლი გაძლიერდება, ხოლო თურქეთისა და ჩრდილოეთ აფრიკის ქვეყნებისთვის დაფინანსების გაზრდაა დაგეგმილი.

სამიტზე გადაწყდა ისიც, რომ აუცილებელია მიგრანტების გადაადგილება ევროკავშირის წევრი ქვეყნების შიგნით შეწყდეს. სწორედ ამიტომ ბლოკი დამატებითი ზომების მიღებას გეგმავს.

შეთანხმება ითვალისწინებს იმასაც, რომ უნდა მოხდეს პრევენცია ახალი საზღვაო თუ სახმელეთო მარშრუტების, რომლითაც მიგრანტები ევროპაში ჩადიან.