ბრიტანელ პოლიციელს „ნოვიჩოკით“ მოწამვლის ეჭვის გამო გამოკვლევა ჩაუტარდა

ბრიტანეთის ქალაქ სოლსბერის ერთ-ერთი საავადმყოფო აცხადებს, რომ „ნოვიჩოკით“ მოწამვლის ეჭვის გამო, მათ რამდენიმე ადამიანმა მიაკითხა, მათ შორისაა ბრიტანელი პოლიციელიც. ამის შესახებ რადიო თავისუფლება წერს.

თუმცა, ჩატარებული გამოკვლევების შედეგად გაირკვა, რომ ისინი „ნოვიჩოკით“ მოწამლულები არ არიან.

ორი ბრიტანელი, რომლებიც 30 ივნისს სოლსბერის საავადმყოფოში გადაიყვანეს, მოწამლულია ნერვულ-პარალიტიკური ნივთიერებით „ნოვიჩოკი“. ორივე დაშავებული - 44 წლის ქალი და 45 წლის კაცი - კრიტიკულ მდგომარეობაშია.

ნიმუშების დეტალური ანალიზის შემდეგ დადგინდა, რომ ქალი და კაცი მოიწამლნენ „ნოვიჩოკით“, რომელიც იდენტიფიცირებულია როგორც იგივე აგენტი, რომლითაც მოიწამლნენ სერგეი და იულია სკრიპალები.

სერგეი და იულია სკრიპალები სიკვდილს გადაურჩნენ და ისინი საავადმყოფოდანაც გაწერეს, თუმცა ექიმების მეთვალყურეობის ქვეშ რჩებიან.