ფინური გაზეთი ტრამპი-პუტინის შეხვედრას ღია წერილით ეხმიანება

ერთ-ერთი უდიდესი ფინური გაზეთი Helsingin Sanomat-ი ჰელსინკიში აშშ-ის პრეზიდენტის დონალდ ტრამპისა და რუსეთის პრეზიდენტ ვლადიმერ პუტინის შეხვედრას ღია წერილით ეხმიანება და პრეზიდენტებს მიმართავს. წერილი ფინურ, ინგლისურ და რუსულ ენებზეა დაწერილი.

გაზეთის თანახმად, უმაღლესი დონის შეხვედრა ჰელსინკელებს წარსულში მომხდარ მსგავს შეხვედრებს ახსენებს და წერს, რომ იყო შემთხვევები, როდესაც უმაღლესი თანამდებობის პირები დაძაბული პოლიტიკური გარემოს გამო ხვდებოდნენ ჰელსინკიში, თუმცა შეხვედრის შემდეგ ლიდერები ერთმანეთს ღიმილით ემშვიდობებოდნენ. ამ ფაქტს სახელწოდებაც კი მოუფიქრეს და "ჰელსინკის სული" ეწოდა. 

Helsingin Sanomat-ი წერს, რომ ამჯერად, ტრამპი-პუტინის შეხვედრის შედეგების წინასწარ პროგნოზირება რთულია, რადგან ბოლო პერიოდის განმავლობაში ბევრი ცვლილება მოხდა ორივე ქვეყანაში. 

"ფინეთი დიდი ხანია შეშფოთებულია რუსეთში განვითარებული მოვლენების გამო. როგორც ჩანს, ჩვენმა მეზობელმა ისეთი პოლიტიკური კურსი აირჩია, სადაც სახელმწიფოს ძალაუფლება და პრესტიჟი დემოკრატიულ ფასეულობებსა და სამოქალაქო თავისუფლებებზე მაღლა დგას", - წერს გაზეთი. 

ამასთან, გაზეთის ცნობით ევროპაში შეშფოთებას გამოთქვამენ აშშ-ში მიმდინარე პროცესებითაც. ასევე განსაკუთრებული სიფრთხილით ეკიდებიან ტრამპის მიერ ჩრდილოეთ კორეის ლიდერის კიმ ჩენ ინის მისამართით გაკეთებულ განცხადებებს:

"იქმნება შთაბეჭდილება, რომ დონალდ ტრამპი საგარეო პოლიტიკაში მიზნად ისახავს უცბად მოიპოვოს წარმატება მისი მოკავშირეების ინტერესების, საკუთარი ქვეყნისა და საერთაშორისო საზოგადოების საზიანოდ. ორი ქვეყნის ლიდერის შეხვედრის წინ, ეს გარემოებები შეწუხებას იწვევს, განსაკუთრებით მაშინ, როდესაც მაგიდის მეორე მხარეს მოლაპარაკებების ისეთი მასტერი დგას, როგორიც ვლადიმერ პუტინია", - წერს Helsingin Sanomat-ი.

დონალდ ტრამპის და ვლადიმერ პუტინის შეხვედრის ოფიციალური პროგრამა ცნობილია. 16 ივლისის ჰელსინკის სამიტი დონალდ ტრამპისა და ვლადიმერ პუტინისთვის პირველი ოფიციალური შეხვედრა იქნება.