ჰასან როუჰანი აშშ-ს: ნუ მოქაჩავთ ლომის კუდს, წინააღმდეგ შემთხვევაში ინანებთ

ნუ მოქაჩავთ ლომის კუდს, წინააღმდეგ შემთხვევაში ინანებთ. ამ სიტყვებით მიმართა ირანის პრეზიდენტმა ამერიკელ კოლეგას და მოუწოდა ისლამური რესპუბლიკის წინააღმდეგ მტრული პოლიტიკის გატარებისგან თავი შეიკავოს. ამის შესახებ First Post-ი წერს. 

ჰასან როუჰანი განმარტავს, რომ მშვიდობის შენარჩუნება ჯერ კიდევ შესაძლებელია და დასძენს, რომ ამერიკის შეერთებული შტატები უნდა ხვდებოდეს რა ნაბიჯებს დგამს. 

მანამდე ირანის პრეზიდენტმა აშშ-ის „მუხლებზე დაყენების“ პირობა დადო. 

დონალდ ტრამპის გადაწყვეტილებით ამერიკის შეერთებული შტატები ირანთან 2015 წელს გაფორმებული ბირთვული შეთანხმებიდან გავიდა. თეთრი სახლის ლიდერმა მოკავშირეებს ირანული ნავთობის შესყიდვაზე უარის თქმისკენ მოუწოდა. 

თეირანი მკაცრად აკრიტიკებს აშშ-ის პრეზიდენტ დონალდ ტრამპის გადაწყვეტილებას, რომელიც ითავლისწინებს ვაშინგტონის ცალმხრივად გამოსვლას 2015 წლის საერთაშორისო ხელშკრელებიდან და სავაჭრო-ეკონომიკური სანქციების განახლებას ირანის წინააღმდეგ.

მანამდე ცნობილი გახდა, რომ ირანმა შესაძლოა სპარსეთის ყურიდან ნავთობის ექსპორტი შეაჩეროს. 

8 მაისს ტრამპმა განაცხადა, რომ 2015 წლის ირანის ბირთვულ შეთანხმებას ტოვებდა, რითაც ახლო აღმოსავლეთში კონფლიქტის რისკი გაზარდა და ევროპელი მეგობრები გაანაწყენა. 

9 მაისს ცნობილი გახდა, რომ ოფიციალური ვაშინგტონი ირანის წინააღმდეგ სანქციებს 180 დღეში აღადგენდა და ის შეზღუდვები რაც ამ ქვეყნის წინააღმდეგ ბირთვული შეთანხმების ფარგლებში იყო დაწესებული კვლავ განახლდებოდა. 24 მაისს კი ცნობილი გახდა, რომ აშშ-მა ირანში არსებულ ცხრა ინდივიდსა და ორგანიზაციას სანქციები დაუწესა. 

14 ივნისს ირანმა აშშ-ის შეთანხმებიდან გასვლის გამო კომპენსაცია მოითხოვა. 

2015 წელს აშშ-მა, საფრანგეთმა, გერმანიამ, დიდმა ბრიტანეთმა, ჩინეთმა და რუსეთმა ირანთან მიღწიეს შეთანხმებას, რომელიც ითვალისწინებს თეირანის მიერ ბირთვულ პროგრამაზე უარის სანაცვლოდ საერთაშორისო სანქციების, მათ შორის ირანის მიერ ნავთობით ვაჭრობის აკრძალვის გაუქმებას.