მესუტ ოზილმა გერმანიის ნაკრებში თამაშზე უარი თქვა

„არსენალის“ თავდამსხმელმა მესუტ ოზილმა გერმანიის ნაკრებში თამაშზე უარი თქვა. ამის შესახებ BBC წერს.

წარმოშობით თურქმა სპორტსმენმა ღია წერილი გამოაქვეყნა, სადაც ის წერს, რომ მისი გადაწყეტილების მიზეზი გერმანიის ფეხბურთის ფედერაციისა და გულშემატკივრების ნაწილის მისდამი დამოკიდებულება გახდა. 

„გულისტკივილითა და დიდი ხნის ფიქრის შემდეგ ბოლო მოვლენებთან დაკავშირებით მივიღე გადაწყვეტილება, რომ გერმანიის ნაკრებში აღარ ვითამაშო, რადგან მე ვგრძნობ რასისტულ და უპატივცემულო დამოკიდებულებას ჩემს მიმართ"- 29 წლის სპორტსმენი Twitter-ზე.

TWITTER POST

ყველაფერი კი თურქეთის პრეზიდენტთან გადაღებული ფოტოთი დაიწყო, რომელმაც სკანდალი გამოიწვია. დღესვე ფეხბურთელმა ამ თემაზე კომენტარი გააკეთა.

მისი თქმით, თურქეთის რეჯეფ თაიფ ერდოღანთან გადაღებული ფოტო არანაირად არ უკავშირდება პოლიტიკასა და არჩევნებს.

„როდესაც მე გერმანიაში ვიზრდებოდი, ჩემი ოჯახის ფესვები მჭიდროდ იყო დაკავშირებული თურქეთთან. მე 2 გული მაქვს: ერთი გერმანული, მეორე - თურქული. ბავშვობაში დედა ყოველთვის მასწავლიდა პატივი მეცა და არ დამვიწყებოდა საიდან ვარ“- დაწერა ფეხბურთელმა Twitter-ზე.

როგორც ოზილი ამბობს, ერდოღანთან მან მხოლოდ ფეხბურთზე ისაუბრა. მესუტ ოზილი და გერმანიის ნაკრების კიდევ ერთი ფეხბურთელი იკაი გიუნდოგანი ერდოღანს წინასაარჩევნო კამპანიის დროს შეხვდნენ და მასთან ერთად ფოტო გადაიღეს, რასაც სკანდალი მოჰყვა.

გერმანიაში ორივე ფეხბურთელი, რომელთა მშობლებიც თურქეთიდან არიან, კრიტიკის ქარცეცხლში გაეხვია. გერმანიის ნაკრების მთავარმა მწვრთნელმა იოაჰიმ ლიოვმა მათ საქციელს წარუმატებელი უწოდა და აღნიშნა, რომ ეს შემთხვევა მათთვის გაკვეთილი იქნება.