სომხეთის ექსპრეზიდენტის ადვოკატების თქმით, მათ ემუქრებიან და შეურაცხყოფას აყენებენ

სომხეთის ყოფილი პრეზიდენტის, რობერტ ქოჩარიანის ადვოკატები აცხადებენ, რომ მათ ემუქრებიან და შეურაცხყოფას აყენებენ. დაკავებული ექსპრეზიდენტის ერთ-ერთი ადვოკატის, აიკ ალუმიანის თქმით, მის მიმართ მუქარა მას შემდეგ დაიწყო, რაც ქოჩარიანის დაცვას მოჰკიდა ხელი. ინფორმაციას Jamnews-ი ავრცელებს.

"მწერენ: "დაისჯები, ქვეყნის მოღალატე ხარ, და რობერტთან ერთად გასამართლდები; შენ ხალხის წინააღმდეგ წახვედი, და ვიცით, სადაც ცხოვრობო“, - ამბობს აიკ ალუმიანი და დასძენს, რომ სოციალურ ქსელებში გამოქვეყნებული მუქარების შესახებ სამართალდამცველებს ინფორმაცია აქვთ, თუმცა მათ დასასჯელად არაფერს აკეთებენ.

"არასდროს მინახავს ადვოკატების მიმართ ამგვარი დამოკიდებულება. და ეს ჩემთვის საშიში პრეცედენტების სიმპტომებია. ყველა მხრიდან ამბობენ, რომ სასამართლოზე ზეწოლა არ იქნება. და ვხედავ , რომ ხელისუფლების მხრიდან სასამართლოზე ზეწოლა მართლაც არ არის. მაგრამ სასამართლოზე თუ ასეთი მკაცრი საზოგადოებრივი ზეწოლა განხორციელდება, რაღაზეა საუბარი. მოსამართლემ, რომელმაც განაჩენი  უნდა გამოიტანოს, არ შეიძლება, რომ საკუთარ თავზე ეს ზეწოლა არ იგრძნოს“, - ამბობს ადვოკატი.

სომხეთის ყოფილი პრეზიდენტი რობერტ ქოჩარიანი 28 ივლისს დააკავეს. სასამართლომ ყოფილი პრეზიდენტის დაპატიმრების შესახებ გადაწყვეტილება 2008 წლის პირველ მარტს აქციის დარბევის საქმესთან დაკავშირებით გამოიტანა. მას ორთვიანი წინასწარი პატიმრობა აქვს შეფარდებული.

2008 წლის საპრეზიდენტო არჩევნების შემდეგ, რომელშიც სერჟ სარგსიანმა გაიმარჯვა, მისი მოწინააღმდეგის, ლევონ ტერ-პეტროსიანის მომხრეები ქუჩაში გამოვიდნენ და კენჭისყრის შედეგების გადახედვა მოითხოვეს. ქოჩარიანმა, რომელიც იმ მომენტში პრეზიდენტის უფლებამოსილებას ასრულებდა, ქვეყანაში საგანგებო მდგომარეობა შემოიღო და დემონსტრაციები დაშალა: შეტაკებების დროს ორი პოლიციელი და 8 მომიტინგე დაიღუპა, ათობით ადამიანი დაშავდა.

ივნისში გამოცხადდა, რომ სომხეთის ყოფილი პრეზიდენტის ნათესავებს უკანონო მეწარმეობასა და დოკუმენტების გაყალბებაში სდებდნენ ბრალს. საქმის ფიგურანტები გახდნენ პოლიტიკოსის ძმა ლევონ სარგსიანი და მისი შვილები ანი და ნარეკი. გარდა ამისა, სისხლის სამართლის საქმე აღიძრა სარგსიანის ყოფილი მცველის წინააღმდეგ.

12 ივლისს სომხეთში მკვლელობის მცდელობის ბრალდებით სერჟ სარგსიანის ძმისშვილი დააკავეს და წინასწარი პატიმრობა შეუფარდეს. 8 ივლისს სომხეთის პრემიერმინისტრმა ნიკოლ ფაშინიანმა განაცხადა, რომ სარგსიანების ოჯახი სომეხი სამართალდამცველების სამიზნე არ არის.