რა უნდა ვიცოდეთ ამერიკის შუალედურ არჩევნებზე

რა უნდა ვიცოდეთ ამერიკის შეერთებული შტატების შუალედურ არჩევნებზე - ამ თემით "ამერიკის ხმა" დაინტერესდა და ვრცელი მასალა მოამზადა.

როგორც წესი ამერიკის შეერთებულ შტატებში შუალედური არჩევნები ყოველ ორ წელიწადში ერთხელ ტარდება. მას შუალედური არჩევნები იმის გამო ჰქვია, რომ ის ოთხწლიანი საპრეზიდენტო ვადის შუაში - 2 წელში ერთხელაა.

ამ არჩევნებზე ამერიკელები წარმომადგენელთა პალატის 435-ვე წევრს და სენატის ერთ მესამედს ირჩევენ. ისტორიულად, შუალედური არჩევნების მიმართ ინტერესი და მასთან ერთად, ამომრჩევლის ჩართულობა დაბალია. თუმცა, ამ არჩევნებს დიდი გავლენა აქვს იმაზე, თუ რა მიმართულებით განაგრძობს კონგრესი მუშაობას მომდევნო ორი წლის განმავლობაში.

შუალედური არჩევნების განრიგი ამერიკის კონსტიტუციითაა განსაზღვრული, რომელშიც წერია, რომ “წარმომადგენელთა პალატა უნდა შედგებოდეს წევრებისგან, რომლებსაც შტატების მოსახლეობა ორ წელიწადში ერთხელ აირჩევს.” (შეერთებული შტატების კონსტიტუცია, 1 მუხლი)

როგორც სტატიაში წერია, შუალედური არჩევნები ხშირად იმის კარგი ინდიკატორია, თუ რამდენად მოსწონს ამერიკას პრეზიდენტის საქმიანობა და მისი პოლიტიკის მიმართულება. პრეზიდენტების უმრავლესობა არჩევიდან ორ წელში ხშირად პოპულარობას კარგავენ და მათი მხარდამჭერებიც უფრო ნაკლებად აქტიურობენ არჩევნების დროს. ოპოზიციური პარტია, კი როგორც წესი, უფრო მეტადაა ორგანიზებული შეუალედური არჩევნების დროს. ამერიკის სამოქალაქო ომის შემდეგ 1860-იანი წლებიდან დღემდე, პრეზიდენტის პარტიამ 39-დან 36 არჩევნებში კონგრესში ძალა დაკარგა. ​

მაგალითად, დემოკრატებმა 2010 წელს პრეზიდენტ ბარაკ ობამას არჩევიდან ორ წელში წარმომადგენელთა პალატაში 63 ადგილი დაკარგეს, 1994 წელს კი ბილ კლინტონოს პრეზიდენტობის დროს 52. 2006 წელს რესპუბლიკელებმა პრეზიდენტ ჯორჯ ბუშის დროს 30 ადგილი დაკარგეს, 1974 წელს კი პრეზიდენტ ჯერალდ ფორდის ადმინისტრაციის დროს 48.

საპრეზიდენტო არჩევნებში, ისტორულად, ამერიკელი ამომრჩევლის 60 პროცენტი მონაწილეობს. შუალედურ არჩევნებში ამომრჩევლის ჩართულობა 40 პროცენტამდე მცირდება.

2014 წელს შუალედურ არჩევნებში მონაწილეობა ამომრჩევლის 36.4 პროცენტმა მიიღო, რაც 1942 წლის შემდეგ ყველაზე დაბალი მაჩვენებელია. 

აშშ-ის პრეზიდენტის დონალდ ტრამპის თქმით, დემოკრატების შუალედურ არჩევნებში გამარჯვებით მისი პოლიტიკა "ძალადობრივად" შეიცვლება. 

ევანგელისტური ეკლესიის ლიდერებთან დახურულ კარს მიღმა შეხვედრისას, ტრამპმა თქვა, რომ კენჭისყრა იქნება „რეფერენდუმი“ სიტყვის და რელიგიის თავისუფლებაზე და რომ „მოძალადე ადამიანების“ გამარჯვების შემთხვევაში, ამ ყველაფერს საფრთხე დაემუქრება.

2018 წლის ნოემბერში აშშ-ში შუალედური არჩევნები ტარდება, რომელზეც სრულად გადაირჩევენ აშშ-ის წარმომადგენლობით პალატას, ასევე სენატორების მესამედს. გარდა ამისა, 39 შტატში ახალ გუბერნატორებს აირჩევენ.