გაერო აშშ-ს პალესტინელი ლტოლვილებისთვის დახმარების შეწყვეტის გამო აკრიტიკებს

გაეროს პალესტინელ ლტოლვილთა სააგენტოს ხელმძღვანელი, პიერ კრაენბული ამბობს, რომ აშშ-ს გადაწყვეტილება გაეროს პალესტინელ ლტოლვილთა სააგენტოს დაფინანსების შეწყვეტის თაობაზე, პოლიტიკურად მოტივირებული ნაბიჯია. ამის შესახებ Dailysabah-ი წერს. 

კრაენბული მოუწოდებს დონორებს, დაეხმარონ სააგენტოს $217- მილიონიანი დეფიციტის დაფარვაში. 

იქამდე, ოფიციალურმა ვაშინგტონმა სააგენტოს ფინანსურ-საბიუჯეტო პოლიტიკა გააკრიტიკა.

„მკაფიოდ მინდა განვაცხადო, რომ აშშ-ის გადაწყვეტილება პოლიტიკითაა მოტივირებული და არაფერი აქვს საერთო სააგენტოს ფინანსურ მოდელთან“ - თქვა პიერ კრაენბულმა იორდანიის დედაქალაქში, ამანში ჟურნალისტებთან შეხვედრისას. 

1 სექტემბერს ცობილი გახდა, რომ აშშ-ის სახელმწიფო დეპარტამენტის განცხადებით, აშშ გაეროში პალესტინელ ლტოლვილთა სააგენტოს დაფინანსებას წყვეტს. ასევე, ამერიკის შეერთებული შტატები აპირებს, რომ 300 მილიონი დოლარი, რომლითაც პაკისტანს თავდაცვის სფეროს რეფორმირებასა და ტერორიზმის წინააღმდეგ ბრძოლაში ეხმარებოდა, აღარ გამოუყოს.

გერმანიის მთავრობამ კი პირობა დადო, რომ გაეროში, პალესტინელ ლტოლვილთა სააგენტოს დაფინანსებას გაზრდის.

ამჟამად სააგენტო ახლო აღმოსავლეთში დაახლოებით 5 მილიონ ადამიანს ეხმარება, მათ შორის სამედიცინო და სოციალური დახმარების, ასევე განათლების მიმართულებით.