აშშ კუბაზე ამერიკელ დიპლომატებზე თავდასხმაში რუსეთის ბრალს არ ადასტურებს

აშშ-ის ხელისუფლება არ ადასტურებს ტელეკომპანია NBC-ის ინფორმაციას იმის შესახებ, რომ კუბაზე ამერიკის შეერთებული შტატების საელჩოს თანამშრომლებზე ეგრეთ წოდებული „აკუსტიკური თავდასხმების“ უკან შესაძლოა რუსეთის ფედერაცია იდგეს. ამის შესახებ აშშ-ის სახელმწიფო დეპარტამენტის პრესსამსახურის უფროსმა ჰეზერ ნაუერტმა განაცხადა. 

სახელმწიფო დეპარტამენტის წარმომადგენლის თქმით, ვაშინგტონი აგრძელებს გამოძიებას, რათა დაადგინოს მიზეზები, რის გამოც კუბაში ამერიკელი დიპლომატების ჯანმრთელობა მკვეთრად გაუარესდა:

"ამ ეტაპზე, არც მიზეზებია ცნობილი და არც კონკრეტული ადამიანის თუ ადამიანთა ჯგუფი, რომელსაც მომხდარზე პასუხისმგებლობა დაეკისრება", - თქვა ჰეზერ ნაუერტმა.

2 სექტემბერს New York Times-მა გამოაქვეყნა სტატია, რომელშიც წერს, რომ კუბაზე ამერიკის შეერთებული შტატების საელჩოს თანამშრომლებზე ეგრეთწოდებული „აკუსტიკური თავდასხმების“ უკან შესაძლოა რუსეთის ფედერაცია იდგეს. 

ექსპერტების შეფასებით, ვაშინგტონსა და ჰავანას შორის ურთიერთობების დალაგება მოსკოვის ინეტერესებში არ შედის, ამიტომ დიპლომატიური კავშირების გაწყვეტას რუსეთი ყველა საშუალებით ცდილობს. გარდა ამისა, გამოცემა პენსილვანიის უნივერსიტეტის ნეიროქირურგიის დეპარტამენტზე დაყრდნობით წერს, რომ დიპლომატები დიდი ალბათობით მიკროტალღური გამოსხივების შედეგად დაშავდნენ. 

სპეციალისტები ამ დასკვნამდე დაშავებულებზე ხანგრძლივი დაკვირვების შემდეგ მივიდნენ. მეცნიერების განცხადებით, ეჭვის საფუძველს დაზარალებულების სიმპტომები იძლევა.

ამერიკელ დიპლომატებს კუბაზე მოწამვლის შემდეგ, რიგ პრობლემებთან ერთად, თავის ძლიერი ტკივილი და სმენის დაქვეითება აღენიშნებოდათ.

2017 წლის 12 აგვისტოს აშშ-მა კუბა ამერიკელ დიპლომატებზე აკუსტიკურ თავდასხმაში დაადანაშაულა. მაშინ Associated Press-მა თეთრ სახლზე დაყრდნობით დაწერა, რომ 2016 წლის შემოდგომაზე, კუბაში ამერიკის საელჩოს დაახლოებით ხუთმა თანამშრომელმა ერთდროულად დაიჩივლა, რომ სმენა დაკარგეს. დიპლომატები არამხოლოდ სმენის დაკარგვაზე ჩიოდნენ, არამედ ისეთ სიმპტომებს აღწერდნენ, რომ სავარაუდოდ ტვინის შერყევაც ჰქონდათ.

არაოფიციალურად, ამერიკელი ჩინოსნები ამბობდნენ, რომ დილომატები დაშავდნენ რაღაც მოწყობილობის გამო, რომელსაც შეუძლია ისეთი ბგერების გამოცემა, რომელიც ადამიანს არ ესმის (ინფრაბგერა - რაც ადამიანის სმენადობის მინიმალურ სიხშირულ ზღვარს შეესაბამება. მას შეუძლია გამოიწვიოს გულისრევა, თავის ტკივილი, უჰაერობა და სხვ). 

2017 წლის 3 სექტემბერს კი ამერიკის შეერთებული შტატებიდან 15 კუბელი დიპლომატი გააძევეს, მიზეზად კი, კუბაში ამერიკელ დიპლომატებზე განხორციელებული „საიდუმლოებით მოცული" აკუსტიკური თავდასხმა დაასახელეს.