მაკედონიის პრემიერი მოსახლეობას მოუწოდებს, ქვეყნის სახელწოდების შეცვლას მხარი დაუჭირონ

მაკედონიის პრემიერმინისტრი ზორან ზაევი აცხადებს, რომ თუ მოქალაქეები არ დაეთანხმებიან ქვეყნისთვის სახელწოდების შეცვლას, მაკედონიას არასტაბილურობა და იზოლაცია ელოდება. ამის შესახებ "რადიო თავისუფლება" წერს.

ზაევი მოუწოდებს მაკედონიელებს, რათა 30 სექტემბერის რეფერენდუმზე მხარი დაუჭირონ ახალ სახელს - მაკედონიის ჩრდილოეთ რესპუბლიკა, რომელზეც საბერძნეთთან კომპრომისული შეთანხმება შედგა.

მეზობელი საბერძნეთი ეწინააღმდეგება სახელწოდება მაკედონიას, რადგან შიშობს, რომ ის ითვალისწინებს ტერიტორიულ პრეტენზიებს ანალოგიური სახელწოდების ჩრდილოეთ საბერძნეთის მიმართ. სახელწოდების საკითხში საბერძნეთის წინააღმდეგობის გამო მაკედონიას თავის რიგებში მიღებაზე უარს ეუბნებიან ნატო და ევროკავშირი.

ევროპული კურსის მომხრე ზორან ზაევს ორმილიონიან ქვეყნაში მოწინააღმდეგეები ჰყავს ნაციონალისტური ძალების სახით, მაგრამ მაკედონიის პრემიერმინისტრი დარწმუნებულია, რომ რეფერენდუმზე გატანილ საკითხს მოსახლეობის უმრავლესობა დადებით პასუხს გასცემს.

„იმდენად მტკიცედ ვარ დარწმუნებული რეფერენდუმის წარმატებაში, რომ ყურადღებას არც ვაქცევ სხვა მოსაზრებას“,- განაცხადა ზაევმა.

აშშ-ის პრეზიდენტმა დონალდ ტრამპმა 6 სექტემბერს წერილი მისწერა მაკედეონიელ კოლეგას გიორგე ივანოვს, რომელშიც ნათქვამია, რომ „მაკედონიის გაწევრიანება ნატოში გააძლიერებს, უსაფრთხოებას, სტაბილურობას და კეთილდღეობას მთელ რეგიონში“.

მაკედონიის სახელწოდების შესახებ კამათი 1991 წელს იუგოსლავიიდან დამოუკიდებლობის მოპოვების შემდეგ დაიწყო. ახლა, როდესაც მაკედონია ნატოსა და ევროკავშირში გაწევრიანებას გეგმავს, მისი სახელწოდება კიდევ უფრო აქტუალური გახდა. საბერძნეთის ხელისუფლება შიშობს, რომ ამ სახელწოდებამ შესაძლოა ჩრდილოეთ საბერძნეთის პროვინცია მაკედონიასთან დაკავშირებით სირთულეები შექმნას.