აშშ მიესალმება უკრაინის ეკლესიის ავტოკეფალიას

აშშ-ის სახელმწიფო დეპარტამენტის სპეციალურმა წარმომადგენელმა უკრაინის საკითხებში, კურტ ვოლკერმა განაცხადა, რომ ვაშინგტონი მხარს უჭერს უკრაინის სწრაფვას, ჰქონდეს ავტოკეფალიური ეკლესია, რადგან აშშ-ს სჯერა რელიგიის თავისუფლების პრინციპის. ინფორმაციას "რადიო თავისუფლება" ავრცელებს.

ბრიუსელიდან სატელეფონო ბრიფინგის დროს ვოლკერი მიესალმა კონსტანტინეპოლის საპატრიარქოს გადაწყვეტილებას უკრაინის ეკლესიის ავტოკეფალიის შესახებ. ამერიკელი დიპლომატი გამოეხმაურა რუსეთის მართლმადიდებელი ეკლესიის განცხადებასაც, რომ უკრაინისთვის ავტოკეფალიის მინიჭება კატასტროფა იქნება და ძალადობას გამოიწვევს.

კურტ ვოლკერის განცხადებით, ტრაგედიაა როცა გყავს სასულიერო ლიდერები, რომლებიც ძალადობაზე ლაპარაკობენ. ვოლკერმა იმედი გამოთქვა, რომ პროტესტი და ძალადობრივი ქმედებები არ იქნება.

კიევის საპატრიარქო იმედოვნებს, რომ კონსტანტინოპოლის საპატრიარქო ტომოსს ნოემბერში გამოსცემს. როგორც უკრაინული ტელეკომპანიის ეთერში კიევის საპატრიარქოს პრესმდივანმა, ევსტრატი ზორიამ განაცხადა, კონსტანტინოპოლის საპატრიარქოს სინოდის მორიგი სხდომა ნოემბრის ბოლოს გაიმართება და მასზე უკრაინამ შესაძლოა, ტომოსი მიიღოს.

„გვსურს, რაც შეიძლება მალე გავაკეთოთ ყველაფერი, რომ არ გადავდოთ ეს საკითხი დიდი ხნით, რადგან ტომოსი უნდა იყოს გამოცემული ნოემბრის მეორე ნახევარში, სინოდის სხდომაზე. ამ ერთი თვის განმავლობაში უკრაინაში უნდა შევასრულოთ ჩვენი „საშინაო სამუშაო“, რომ კონსტანტინოპოლის საპატრიარქოში შესრულებული ამოცანებით მივიდეთ და მივიღოთ აღნიშნული დოკუმენტი“, – განაცხადა ზორიამ.

11 ოქტომბერს მსოფლიო საპატრიარქოს სინოდმა კიევის პატრიარქ ფილარეტის მიმართ ანათემა გაუქმებულად, ხოლო 1686 წელს მოსკოვის მიერ კიევის მიტროპოლიის ანექსია უკანონოდ გამოაცხადა. კიევის ეკლესიისთვის ავტოკეფალიის გადაცემის ოფიციალური პროცესი დაიწყო.

კონსტანტინოპოლის საპატრიარქოს მიერ უკრაინის ეკლესიისთვის ავტოკეფალიის მინიჭების შესაძლებლობას მართლმადიდებელ სამყაროში დაპირისპირება მოჰყვა.