Post-ის ჟურნალისტის გამო, ბრიტანეთმა და აშშ-მა საუდის არაბეთს შესაძლოა ბოიკოტი გამოუცხადონ

დიდმა ბრიტანეთმა და ამერიკის შეერთებულმა შტატებმა საუდის არაბეთს შესაძლოა ბოიკოტი გამოუცხადონ. ლაპარაკია საერთაშორისო კონფერენციაზე, რომელიც 28 ოქტრომბერს ერ-რიადში უნდა ჩატარდეს. ამის შესახებ BBC წერს.

ამის მიზეზი კი The Washington Post-ის მიმომხილველის გაუჩინარება და სავარაუდო მკვლელობაა. როგორც თურქული წყარო განმარტავს, ჯამალ ჰაშაღი საუდელი აგენტების ჯგუფმა მოკლა. 

თურქეთის უსაფრთხოების სამსახურიდან წყარომ BBC-ს განუმარტა, რომ უწყებას ჟურნალისტის მკვლელობის დამადასტურებელი ვიდეო და აუდიო მტკიცებულება აქვთ. ირკვევა, რომ სტამბოლში საუდის არაბეთის საკონსულოში არსებული ვითარების შესახებ ჯამალ ჰაშაღიმ Apple-ის ჭკვიანი საათის მეშვეობით თავად ჩაიწერა რეალობის ამსახველი აუდიო მასალა. 

იმ შემთხვევაში, თუ ჟურნალისტის გაუჩინარების მიღმა საუდის არაბეთი დგას, ამერიკის შეერთებული შტატების პრეზიდენტი მკაცრი სასჯელით იმუქრება, ხოლო დიდი ბრიტანეთის საგარეო საქმეთა სამინისტრო საუდის არაბეთის ძალოვანი სტრუქტურების წარმომადგენლების და თანამდებობის პირთა მიმართ სანქციების სიას ადგენს.

2 ოქტომბერს ჯამალ ჰაშაღი სტამბოლში საუდის არაბეთის გენერალურ საკონსულოში მივიდა, მას შემდეგ რაც საკონსულოს თანამშრომლები მას ტელეფონით დაუკავშირდნენ და გარკვეული დოკუმენტების ხელმოწერის მიზნით საკონსულოში მისვლა სთხოვეს. ამის შემდეგ მისი კვალი იკარგება.

ჟურნალისტი ერ-რიადის მიმართ კრიტიკული განცხადებებით არის ცნობილი. 2017 წელს მან სამშობლო დატოვა და საცხოვრებლად აშშ-ში გადავიდა. ჟურნალისტი საუდის არაბეთის მოქალაქეა.