ბოლტონი: მთავარი საფრთხე ევროპაში რუსული რაკეტებია

"ბირთვულ იარაღზე, საბჭოთა კავშირთან გაფორმებული შეთანხმების დატოვება გლობალურ სტაბილურობას საფრთხეს არ შეუქმნის, მთავარი საფრთხე ევროპაში რუსული რაკეტებია“ - ეს განცხადება ამერიკის შეერთებული შტატების პრეზიდენტის მრჩეველმა გააკეთა. ამის შესახებ USAtoday წერს.

მოსკოვში, ოფიციალური ვიზიტით მყოფი ჯონ ბოლტონის თქმით, რუსეთი ფრთოსანი რაკეტების "ნოვატორ- 9 ემ -729“ - ის გამოცდით, შეთანხმების პირობებს არღვევს. გარდა ამისა, ტრამპის მრჩეველი აცხადებს, რომ 31 წლის წინ ხელმოწერილი დოკუმენტი მოძველდა და ის მხარეების ინტერესებს სრულად ვერ ასახავს.

ვლადიმერ პუტინთან თითქმის 2-საათიანი შეხევდრის შემდეგ ბოლტონმა აღნიშნა, რომ ამ დრომდე შეთანხმების პირობებს სრულად, მხოლოდ ამერიკის შეერთებულ შტატები იცავდა.

ვაშინგტონის ბრალდებებს მოსკოვში უსაფუძვლოს უწოდებენ. კრემლში აცხადებენ, რომ 1987 წელს გაფორმებული შეთანხმების პირობები არა მოსკოვმა, არამედ ვაშინგტონმა დაარღვია. უკმაყოფილებას ამერიკის შეერთებული შტატების მიერ რუმინეთში ანტისარაკეტო სისტემის განთავსება იწვევს. 

ამერიკის შეერთებული შტატების პრეზიდენტმა დონალდ ტრამპმა უკვე დაადასტურა, რომ ოფიციალური ვაშინგტონი რუსეთთან ბირთვულ იარაღზე შეთანხმებას ტოვებს. უფრო მეტიც, აშშ რუსეთსა და ჩინეთზე ზეწოლისთვის ბირთვულ არსენალს გააძლიერებს.

შეთანხმებიდან დიდი ბრიტანეთიც გადის. 

საშუალო და ახლო მოქმედების რაკეტების ლიკვიდაციის შეთანხმება (Intermediate-Range Nuclear Forces (INF)) სსრკ-ის მაშინდელ პრეზიდენტს მიხეილ გორბაჩოვსა და აშშ-ის მაშინდელ პრეზიდენტს რონალდ რეიგანს შორის 1987 წლის 8 დეკემბერს გაფორმდა. ეს ცივი ომის ერთ-ერთ ყველაზე მნიშვნელოვან შეთანხმებად მიიჩნევა. მაშინ მოსკოვმა და ვაშინგტონმა უარი თქვა საშუალოდ ახლო მოქმედების ბალისტიკური და საკრუიზო რაკეტების შექმნაზე და არსებულის განადგურებაზე შეთანხმდნენ. ასეთ რაკეტებს მიზნამდე მიღწევა რამდენიმე წუთში შეუძლიათ. 

შეთანხმების პრეამბულაში წერია, რომ მხარეებმა ამ დოკუმენტზე ხელმოწერა გადაწყვიტეს, რამეთუ იაზრებენ, რომ "ბირთვულ ომს მთელი კაცობრიობისთვის დამანგრეველი შედეგები ექნება."