მოკლული საუდელი ჟურნალისტის საცოლემ ტრამპთან შეხვედრაზე უარი თქვა

თურქეთში, საუდის არაბეთის საკონსულოში მოკლული ჟურნალისტის, ჯამალ ჰაშაღის საცოლე, ჰატიჩი ჯენგიზი ამბობს, რომ ოფიციალური ვაშინგტონისგან თეთრ სახლში, აშშ-ის პრეზიდენტთან, დონალდ ტრამპთან შესახვედრად მიწვევა მიიიღო, თუმცა მან ამაზე უარი თქვა. ამის შესახებ BBC წერს.

​ჯენგიზის თქმით, ტრამპი ჟურნალისტის მკვლელობის გამოძიების შესახებ საუბრისას თვალთმაქცობს. 

26 ოქტომბერს ჯამალ ჰაშაღის ვაჟი სალაჰ ჯამალ ჰაშაღი საუდის არაბეთიდან, ოჯახთან ერთად, აშშ-ში ჩავიდა. აქამდე ჟურნალისტის ოჯახის წევრებს საუდის არაბეთის დატოვების უფლება არ ჰქონდათ იმის გამო, რომ ჯამალ ჰაშაღი სამეფოს მმართველების მიმართ მწვავე კრიტიკით გამოირჩეოდა. 

საუდელი ჟურნალისტი 2018 წლის 2 ოქტომბერს გაუჩინარდა. ის სტამბოლში მდებარე საუდის არაბეთის საკონსულოში მეუღლესთან გაყრის შესახებ საბუთის ასაღებად მივიდა. ჯამალ ჰაშაღის საქმეზე მწვავე განცხადებები გაკეთდა ვაშინგტონსა და ბრიუსელში. დიდი შვიდეული სამიტზე კი ევროპელმა ლიდერებმა ერ-რიადს, ჟურნალისტის გაუჩინარებასთან დაკავშირებით, გამჭვირვალე და დაუყოვნებლივი გამოძიების დაწყებისკენ მოუწოდეს.

საუდის არაბეთმა ჟურნალისტის დაღუპვის ფაქტი ოფიციალურად აღიარა. მომხდართან დაკავშირებით 18 ადამიანია დაკავებული. 

23 ოქტომბერს, თურქეთის ოპოზიციური პარტია „ვატანის“ ლიდერის დოგუ პერინჩეკის ინფორმაციაზე დაყრდნობით გავრცელდა ინფორმაცია, რომ საუდელი ჟურნალისტის ჯამალ ჰაშაღის სხეულის ნაწილები სტამბოლში საუდის არაბეთის საკონსულოს ეზოში, ჭაში იპოვეს.

ჯამალ ჰაშაღი ამერიკულ გაზეთ The Washington Post-თან თანამშრომლობდა და ღიად აკრიტიკებდა საუდის არაბეთის მმართველ პრინც მუჰამედ ბინ სალმანს.