დენის ვორონენკოვის მკვლელი საავადმყოფოში გარდაიცვალა

რუსეთის დუმის ყოფილი დეპუტატის დენის ვორონენკოვის მკვლელის გადარჩენა ექიმებმა ვერ შეძლეს. ინფორმაციას უკრაინული სააგენტო Вестям ავრცელებს. 

რუსეთის დუმის ექსდეპუტატი დენის ვორონენკოვი კიევის ცენტრში, სასტუმრო "პრემიერ პალასთან" დღეს მოკლეს. მკვლელმა, ასევე დაჭრა ვორონენკოვის დაცვის წევრი, რომელმაც თავის მხრივ, მოასწრო მკვლელისთვის სროლა და მისი დაჭრა. 

შემთხვევას შეესწრო ვორონენკოვის ცოლი, რომელიც მასთან შესახვედრად მიემართებოდა. 

პოლიციამ ეჭვმიტანილი მალევე დააკავა. ის უკრაინის მოქალაქე აღმოჩნდა, რომელსაც ფულის გათეთრების ბრალდებით სამართალდამცველები ეძებდნენ. 

უკრაინის პრეზიდენტი პეტრო პოროშენკო ფიქრობს, რომ დეპუტატის მკვლელობა შეკვეთილია. 

ოფიციალური მოსკოვი აღნიშნულ ბრალდებას აბსურდულს უწოდებს. რუსეთის პრეზიდენტის პრესსპიკერი დიმიტრი პესკოვის განცხადებით, ვორონენკოვის მკვლელობა კიდევ ერთხელ ადასტურებს, რომ უკრაინამ ვერ შეძლო ექსპარლამენტარის უსაფრთხოების დაცვა.

რუსეთის დუმის ყოფილი დეპუტატი დენის ვორონენკოვი კიევში 2016 წლის შემოდგომიდან, ცოლთან, მარია მაკსაკოვასთან ერთად ცხოვრობდა. მომღერალი და პარტია "ერთიანი რუსეთის" წევრი მაკსაკოვა ასევე დუმის წევრი იყო. ვორონენკოვი კიევში რუსეთის მხრიდან სამართლებრივ დევნას გაექცა. მოკოვში მას 5 მილიონი დოლარის ღირებულების შენობის უკანონოდ მითვისებაში ადანაშაულებდნენ. კიევში ჩასულმა ვორონენკოვმა რუსეთის მოქალაქეობაზე უარი თქვა და უკრაინის მოქალაქეობა მიიღო. 

2017 წლის ინტერვიუში ვორონენკოვი რუსეთს "ნაცისტურ გერმანიას" ადარებდა, ყირიმის მიერთებას "უხეშ შეცდომას" უწოდებდა და რუსეთში არჩევნების შედეგების ტოტალურ გაყალბებაზე ლაპარაკობდა.