ბრაზილიაში საპრეზიდენტო არჩევნების მეორე ტური იმართება

ბრაზილიაში საპრეზიდენტო არჩევნების მეორე ტური იმართება. ქვეყნის ლიდერის თანამდებობის დასაკავებლად ორი კანდიდატი იბრძვის, - ულტრამემარჯვენე კანდიდატი ჟაირ ბოლსონარუ და მემარცხენე ფერნანდო ჰადადი „მშრომელთა პარტიიდან“. ამის შესახებ BBC წერს. 

გარდა ქვეყნის პირველი პირისა, ბრაზილიელები 27 შტატში გუბერნატორებსაც ირჩევენ. ბრაზილიაში 147,3 მილიონი ამომრჩეველია რეგისტრირებული. საარჩევნო უბნები ბრაზილიაში ადგილობრივი დროით 8:00 საათზე გაიხსნა. ამომრჩევლებს არჩევანის დაფიქსირების საშუალება 17:00 საათამდე (თბლისის დროით 00:00) აქვთ. არჩევნების წინასწარი შედეგების გამოცხადება 19:00 საათზე (თბლისის დროით 02:00) არის დაგეგმილი.

ქვეყანაში არჩევნების მეორე ტური მას შემდეგ დაინიშნა, რაც 7 ოქტომბერს, პირველ ტურში ვერცერთმა კანდიდატმა ვერ შეძლო ხმათა 51%-ის მიღება. 

პირველი ტური ჟაირ ბოლსონარუმ მოიგო 46%-ით, ხოლო მეორე ადგილზე მემარცხენე „მშრომელთა პარტიის“ კანდიდატი ფერნანდუ ჰადადი იყო, რომელსაც ამომრჩეველთა  29%-მა დაუჭირა მხარი.

ულტრამემარჯვენე ბოლსონარუს მედია „ბრაზილიელ ტრამპს“ უწოდებს. ის ცნობილია თავისი მკაცრი და ხშირად არაპოლიტკორექტული განცხადებებით ქალებისა და ლგბტ თემის წარმომადგენელთა მიმართ. მისი მთავარი წინასაარჩევნო დაპირება კრიმინალთან ხისტი ბრძოლაა. ის ასევე სიკვდილით დასჯის აღდგენის მომხრეა.

ფერნანდუ ჰადადმა განაცხადა, რომ ბრაზილიაში დემოკრატია საფრთხეშია და ბრაზილიელებს მეორე ტურში მხარდაჭერისკენ მოუწოდა.

ბრაზილიის გეოგრაფიისა და სტატისტიკის ინსტიტუტის (IBGE) მონაცემებით, ბრაზილიაში 50 მილიონზე მეტი ადამიანი, ანუ მოსახლეობის თითქმის 25% სიღარიბის ზღვარს ქვემოთაა. ოჯახების საშუალო თვიური შემოსავალი 387 ბრაზილიური რეალია (დაახლოებით 250 ლარი).