რუსული მედია ირწმუნება, რომ პარიზში პუტინი ტრამპს ესაუბრა

საფრანგეთში პირველი მსოფლიო ომის დასრულებიდან მეასე წლისთავისადმი მიძღვნილი ღონისძიებები იმართება, რომელზეც მსოფლიოს ლიდერები ესწრებიან, მათ შორის აშშ-ის პრეზიდენტი დონალდ ტრამპი და რუსეთის პრეზიდენტი ვლადიმერ პუტინი.

Reuters-ის ცნობით, რუსული სააგენტოები წერენ, რომ ღონისძიებების ფარგლებში ვლადიმერ პუტინი დონალდ ტრამპს ესაუბრა. როგორც რუსული სააგენტოები იუწყებიან, პუტინის თქმით საუბარი კარგად წარიმართა. 

რუსული მედია პუტინის კიდევ ერთ განცხადებას ავრცელებს, რომლის თანახმადაც რუსეთი აშშ-სთან ბირთვული შეიარაღების საკითხებზე დიალოგისთვის მზაობას გამოთქვამს. 

ამერიკის შეერთებული შტატების პრეზიდენტმა დონალდ ტრამპმა უკვე დაადასტურა, რომ ოფიციალური ვაშინგტონი რუსეთთან ბირთვულ იარაღზე შეთანხმებას ტოვებს. შეთანხმებიდან დიდი ბრიტანეთიც გადის. 

ოქტომბერში რუსეთის არმიამ სტრატეგიული ბირთვული ძალების სწავლება ჩაატარა.

პენტაგონი აცხადებს, რომ რუსული ფრთოსანი რაკეტები - "ნოვატორ 9-ემ 729", არღვევს 1987 წლის შეთანხმებას, რომელიც საშუალო რადიუსის ბირთვული ძალების თაობაზე გაფორმდა. თავდაცვის მდივანი ამბობს, რომ შეთანხმების პირობების მიხედვით, მიწიდან თუ ჰაერიდან, იკრძალება ყველა სახის ბირთვული თუ კონვენციური საშუალო რადიუსის რაკეტების გაშვება.

შეთანხმების პირობების დარღვევას რუსეთის კატეგორიულად უარყოფს. პენტაგონის ბრალდებების საპასუხოდ, მოსკოვში აცხადებენ, რომ ხელშეკრულება არა რუსეთმა, არამედ ამერიკის შეერთებულმა შტატებმა დაარღვია და აღმოსავლეთ ევროპაში სარაკეტო თავდაცვის სისტემები განალაგა.

საშუალო და ახლო მოქმედების რაკეტების ლიკვიდაციის შეთანხმება (Intermediate-Range Nuclear Forces (INF)) სსრკ-ის მაშინდელ პრეზიდენტს მიხეილ გორბაჩოვსა და აშშ-ის მაშინდელ პრეზიდენტს რონალდ რეიგანს შორის 1987 წლის 8 დეკემბერს გაფორმდა. ეს ცივი ომის ერთ-ერთ ყველაზე მნიშვნელოვან შეთანხმებად მიიჩნევა. მაშინ მოსკოვმა და ვაშინგტონმა უარი თქვა საშუალოდ ახლო მოქმედების ბალისტიკური და საკრუიზო რაკეტების შექმნაზე და არსებულის განადგურებაზე შეთანხმდნენ. ასეთ რაკეტებს მიზნამდე მიღწევა რამდენიმე წუთში შეუძლიათ. 

შეთანხმების პრეამბულაში წერია, რომ მხარეებმა ამ დოკუმენტზე ხელმოწერა გადაწყვიტეს, რადგან იაზრებენ, რომ "ბირთვულ ომს მთელი კაცობრიობისთვის დამანგრეველი შედეგები ექნება". შეთანხმება ხელმოწერისთანავე ამოქმედდა.