ჩინეთის ხელისუფლებამ მარტორქის რქით ვაჭრობის ლეგალიზება კრიტიკის გამო გადადო

ჩინეთის ხელისუფლებამ გადაწყვიტა, დროებით შეაჩეროს კანონის მიღება, რომლის მიხედვითაც მარტორქის რქითა და ვეფხვის სხეულის სხვადასხვა ნაწილებით ვაჭრობა ნებადართული გახდება. ამის შესახებ CNN-ი წერს. 

ეს მას შემდეგ მოხდა, რაც ქვეყნის მთავრობის დაანონსებულ სიახლეს საერთაშორისო საზოგადოების, ცხოველთა უფლებების დამცველთა მწვავე რეაქცია მოჰყვა. 

ჩინეთის ხელისუფლება გეგმავს, შეცვალოს კანონი და დანაშაულად აღარ ჩაითვალოს გადაშენების პირას მყოფი მარტორქებისა და ვეფხვების სხვადასხვა სახეობის სხეულის ნაწილებით ვაჭრობა. 1993 წლიდან ჩინეთში ეს აკრძალული იყო. ახალი კანონის მიხედვით კი, ვაჭრობა ყველა შემთხვევაში არ იქნება გამართლება. კანონი მხოლოდ შემოზღუდულ სივრცეში, - ზოოპარკებსა ან ნაკრძალებში მცხოვრებ მარტორქებსა და ვეფხვებზე ვრცელდება. ასევე, ნებადართული იქნება მკვდარი მარტორქების რქების გამოყენებაც. 

ჩინურ მედიცინაში მარტორქების დაფქულ რქებს სამედიცინო მიზნებით იყენებენ. მიუხედავად იმისა, რომ მეცნიერების მიერ არაა დადასტურებული მისი სასარგებლო თვისებები, მას მაინც იყენებენ ცხელების, უძილობისა და მენინგიტის სამკურნალოდ. აზიისა და აფრიკის მრავალ ქვეყანაში, მიუხედავად აკრძალვებისა, გადაშენების პირას მყოფი ცხოველების სხეულის სხვადასხვა ნაწილით მაინც ვაჭრობენ. გასული წლის აპრილში მალაიზიაში სამართალდამცველებმა ამოიღეს $3.1 მილიონი ღირებულების რქები, რომლებიც ქვეყანაში მოზამბიკიდან შეიტანეს. 

ერთი კილოგრამი მარტორქის რქა, საშუალოდ, $60 000 ღირს. მარტორქა გადაშენების საფრთხის წინაშე მყოფი ცხოველია, ძირითადად, მათ რქებზე დიდი მოთხოვნის გამო.