ნატო-საქართველო-უკრაინის კომისიის სხდომაზე შავ ზღვაში პატრულირების აუცილებლობას განიხილავენ

ნატო-საქართველო-უკრაინის კომისიიის სხდომაზე უკრაინული მხარე შავ ზღვაში პატრულირების აუცილებლობის საკითხს დააყენებს. ამის შესახებ ევროინტეგრაციის საკითხებში უკრაინის ვიცეპრემიერმა ივანა კლიმპუშ-ცინცაძემ განაცხადა. ინფორმაციას 1tv ავრცელებს.

უკრაინის ვიცეპრემიერის განცხადებით, შავ ზღვაში ნატოს წევრი ქვეყნების სამხედრო ხომალდების პატრულირება უკვე დიდი ხანია ალიანსის შიდა დისკუსიის საკითხია.

„ნატოს წევრი ქვეყნების ნაწილი ახორციელებს შავი ზღვის თავზე საჰაერო პატრულირებას, თუმცა მე ვიცი, რომ ალიანსის ზოგიერთი ქვეყანა აქტიურად უჭერს მხარს შავ ზღვაში სამხედრო ხომალდების პატრულირებასაც. აღსანიშნავია, რომ საქართველომ და უკრაინამ ადრე გამოთქვეს მზადყოფნა, მონაწილეობა მიიღონ პარტნიორებთან ერთად შავი ზღვის სამხედრო-საზღვაო პატრულირებაში“, - აღნიშნა კლიმპუშ-ცინცაძემ.

ნატო-საქართველო-უკრაინის კომისიის სხდომა 4-5 დეკემბერს დაგეგმილ ნატოს საგარეო მინისტერიალის ფარგლებში გაიმართება.

„შეხვედრაზე, ჩვენი მინისტრი კიდევ ერთხელ მიაწვდის ჩვენს პარტნიორებს ინფორმაციას 25 ნოემბერს განვითარებული მოვლენების შესახებ და იმაზე, თუ რა ხდება ამჟამად, კერძოდ, რუსეთის მიერ აზოვის ზღვის უკრაინულ პორტებში ხომალდებისთვის შესვლის ბლოკირებაზე, ჩვენი ხომალდების დაკავებაზე და იმაზე, თუ როგორ ექცევიან ისინი დაკავებულ უკრაინელ მეზღვაურებს“, - განაცხადა კლიმპუშ-ცინცაძემ.

უკრაინის ვიცეპრემიერმა რუსეთის მიერ დაკავებულ უკრაინელ მეზღვაურებს სამხედრო ტყვეები უწოდა. მანამდე უკრაინის პრეზიდენტმა პეტრო პოროშენკომ ნატოს მოუწოდა, აზოვის ზღვაში რამდენიმე ხომალდი გაგზავნოს, რათა უკრაინას უსაფრთხოების უზრუნველყოფაში დაეხმაროს.

25 ნოემბერს ქერჩის სრუტეში რუსეთის საზღვაო ძალებმა სამი უკრაინული გემი და 24 მეზღვაური დააკავეს. რუსეთის სასაზღვრო სამსახურმა უკრაინელი მეზღვაურები საზღვრის უკანონო გადაკვეთაში დაადანაშაულა, ხოლო უკრაინამ რუსეთის მოქმედებას აგრესიის აქტი უწოდა.

26 ნოემბერს უკრაინის რადამ რუსეთთან მოსაზღვრე რეგიონებში საგანგებო მდგომარეობა გამოაცხადა.