რუსების ნახევარი პირად ინტერესს სახელმწიფო ინტერესზე მაღლა აყენებს

რუსეთის მოქალაქეების ნახევარი, რომელმაც მონაწილოება მიიღო „ლევან ცენტრის“ მიერ ჩატარებულ გამოკითხვაში, მიიჩნევს, რომ მოქალაქეები თავიანთი უფლებების დასაცავად უნდა იბრძოდნენ, თუ ეს სახელმწიფოს ინტერესებს ეწინააღმდეგება კიდეც, - იუწყება BBC.

მოსაზრებას, რომ ნებისმიერ ადამიანს აქვს უფლება დაიცვას თავისი უფლებები ისე, რომ არ გაითვალისწინოს სახელმწიფოს ინტერესები, გამოკითხულთა 47 % უჭერს მხარს. 13 % დარწმუნებულია, რომ პირადი უფლებები ყოველთვის უფრო მაღლა დგას, ვიდრე სახელმწიფოსი, თუმცა გამოკითხულთა იგივე პროცენტი მიიჩნევს, რომ ხანდახან ქვეყნის ინტერესის გამო შეიძლება პირად ინტერესზე უარი თქვას (24%), 10 % კი სახელმწიფო ინტერესს ყოველთვის უფრო მაღლა აყენებს, ვიდრე პირადს.

რესპონდენტებს სთხოვეს თავიანთი შეხედულება აეხსნათ. გამოკითხვის მიხედვით, 11 წლის განმავლობაში რუსებს შორის პოპულარული გახდა იდეა „სახელმწიფო ცოტას გვაძლევს, მაგრამ შეიძლება მეტის მოთხოვნაც“, ამ მოსაზრებას ემხრობა გამოკითხულთა 31%. 2006 წელს ასეთი მოსაზრების მქონე ადამიანების მხოლოდ 15 % იყო. იგივე რაოდენობა 31 % დაეთანხმა მოსაზრებას „სახელმწიფო იმდენად ცოტას გვაძლევს, რომ მის მიმართ არავითარი ვალდებულება არ გვაქვს“. კიდევ 19 % მიიჩნევს, რომ „სახელმწიფო უნდა აიძულო ადამიანების ინტერესებს ემსახუროს“. 11 % კი მიიჩნევს, რომ „სახელმწიფომ ყველაფერი მოგვცა, არავის აქვს უფლება მას კიდევ რაიმე მოსთხოვოს“.

წინა კვირას მოსკოვის ცენტრში დაახლოებით 40 ადამიანი დააკავეს, რომლებმაც კორუფციის წინააღმდეგ თავიანთი პოზიცია გამოხატეს. მანამდე ერთი კვირით ადრე პროტესტის გამოხატვისას 1000 ადამიანი დააკავეს.

ვლადიმერ პუტინმა ანტიკორუფციულ აქციებთან დაკავშირებით განაცხადა, რომ მან შეიძლება ქვეყანა გადატრიალებამდე მიიყვანოს „არაბული გაზაფხულის“ მსგავსად.