ბოსნია და ჰერცოგოვინაში შვილმკვდარი მამა ერთი წელია აქციებს მართავს

2018 წლის მარტის შემდეგ ბოსნია და ჰერცოგოვინაში 21 წლის სტუდენტის დავიდ დრაგიჩევიჩის მკვლელობის გამო საპროტესტო აქციები არ სრულდება. ის დაღუპულის მამამ დაიწყო, რომელმაც ხელისუფლება დაადანაშაულა იმაში, რომ ისინი მკვლელებს აფარებენ ხელს. ერთი წლის წინ, ხელისუფლების წინააღმდეგ მხოლოდ მოკლულის მამა გამოვიდა, დღეს კი მას ათასობით ადამიანი შეურთდა. 

მილორად დოდიკი, რომელიც რესპუბლიკას სათავეში უდგას უკვე 12 წელია, პრორუს ნაციონალისტად მიიჩნევა და წესრიგის დარღვევაში დასავლეთის ქვეყნებს უყენებს ბრალს. 

2018 წლის 18 მარტს, სტუდენტი დავიდ დრაგიჩევიჩი გაუჩინარდა. 6 დღეში ის მდინარის ნაპირზე იპოვეს. პოლიციის თანამშრომლებმა განაცხადეს, რომ გაუჩინარების დღეს დრაგიჩევიჩმა სახლი გაქურდა და შემდეგ კი სავარაუდოდ დაიხრჩო, ამავდროულად კი ნარკოტიკული თრობის ქვეშ იმყოფებოდა.  სტუდენტის მამა, 49 წლის ოფიციანტი დავორ დრაგიჩევიჩი კატეგორიულად უარყოფს პოლიციის ვერსიას. მან ერთკაციანი აქციები დაიწყო და მალევე მას ბევრი ადამიანი შეურთდა ლოზუნგით „სამართლიანობა დავიდისთვის“. 

სტუდენტის ცხედარზე აღმოჩენილმა მრავალმა სისხლჩაქცევამ ბევრი ეჭვი გააჩინა. დრაგიჩევიჩი დრედებს ატარებდა, წერდა ლექსებს და არ მალავდა თავის ლიბერალურ შეხედულებას. მისი მეგობრები ვარაუდობენ, რომ პოლიციელებს სურდათ, რომ ის ნარკოტიკზე დამოკიდებულად გამოეყვანათ. 

სერბეთში დრაგიჩევიჩის თხოვნით დამატებითი ექსპერტიზა ჩაატარეს. ბელგრადში დაასკვნეს, რომ დავიდმა წყალში სულ მცირე 4 დღე გაატარა, ესეიგი გაუჩინარებამდე ორი დღის განმავლობაში ცოცხალი იყო. გარდა ამისა, მათ არ გამორიცხეს, რომ აღმოჩენილი სისხლჩაქცევები წამების ნაკვალევია. ავსტრიელი ექსპერტები კი ადასტურებენ, რომ სტუდენტის სხეულში ნარკოტიკის შემცველობა ვერ იპოვეს.

17 დეკემბერს, კიდევ ერთი აქციის შემდეგ დავორ დრაგიჩევიჩი სასამართლოში დაიბარეს „საზოგადოებრივი წესრიგის დარღვევის ბრალდებით“. ის სასამართლოში არ გამოცხადდა და ამის გამო 25 დეკემბერს დააკავეს.