ამერიკელი მოზარდები სულ უფრო ხშირად იცრებიან მშობლების უნებართვოდ

იანვრის დასასრულს მწერალმა ანდრეა ფილიპსმა თავის Twitter-ზე დაწერა, რომ Reddit-ზე ბევრი მოზარდი კითხულობდა, როგორ შეიძლებოდა მშობლების ნებართვის გარეშე აცრა გაეკეთებინა. აცრებთან დაკავშირებით აშშ-ში შტატების მიხედვით კანონმდებლობა იცვლება და ის ძირითად შემთხვევაში ბავშვების მიმართ არც ისე მეგობრულია. ამის შესახებ სტატია Meduza-მ მოამზადა.

თუმცა ზოგიერთ შტატში 18 წლამდე მიუღწეველ მოზარდებს უფლებას აძლევს, თავად მიიღონ გადაწყვეტილება ამა თუ იმ სამედიცინო პროცედურასთან დაკავშირებით. მაგალითად, თუ ექიმი ჩათვლის, რომ ბავშვი საკმაოდ დიდია გადაწყვეტილების მისაღებად, ის ამის უფლებას მოზარდს ანიჭებს.

ამერიკულ მედიაში ეს საკითხი განსაკუთრებით განხილვის საგანი მას შემდეგ გახდა, რაც 18 წლის მოზარდის მიერ Reddit-ზე გამოქვეყნებული პოსტი პოპულარულ სამეცნიერო ჟურნალ Undark-ში დაიბეჭდა. პოსტში 18 წლის ბიჭი მშობლებს "ცოტა სულელებს" ეძახდა და აინტერესებდა როგორ უნდა მოქცეულიყო მაშინ, როდესაც მისმა მშობლებმა ბოლო წლების განმავლობაში მხოლოდ ერთხელ აცრეს.

როგორც გაირკვა, მისი დედა ვაქცინაციის წინააღმდეგი იყო, მამა კი ცოლის შეხედულებებს იზიარებდა. ითანმა მათი გადარწმუნება სცადა, თუმცა არაფერი გამოუვიდა. შედეგად ის რამდენიმე დაავადებით დაავადდა.

მედიაში ამ ისტორიის განხილვისას გაჩნდა მოსაზრებები, რომ მოზარდებისთვის, ვისაც მშობლის ნებართვის გარეშე სურს აცრა, ასაკი დაწიონ, რათა თავად შეძლონ საკუთარ ჯანმრთელობასთან დაკავშირებული საკითხების გადაწყვეტა. 

მაგალითად, რუსეთში არსებული ფედერალური კანონის თანახმად, 15 წლის მოზარდს უკვე შეუძლია მშობლების ნებართვის გარეშე, თავად გასცეს ინფორმირებული დასტური სამედიცინო ჩარევასთან დაკავშირებით.

რაც შეეხება საქართველოს, imedinews-მა დაავადებათა კონტროლისა და საზოგადოებრივი ჯანდაცვის ცენტრს მიმართა შეკითხვით, რა ასაკიდან შეუძლიათ საქართველოში მცხოვრებ მოზარდებს, მშობლის ნებართვის გარეშე სამედიცინო დაწესებულებაში მისვლა და გამოტოვებული აცრის გაკეთება.

როგორც ცენტრში განაცხადეს, ასეთ საკითხებზე გადაწყვეტილების მიღება შეუძლია სრულწლოვან პირს, რომელმაც მიაღწია 18 წელს და ის ქმედუნარიანია. 

ქმედუნარიანობა - ანუ ფიზიკური პირის უნარი, თავისი ნებითა და მოქმედებით სრული მოცულობით შეიძინოს და განახორციელოს სამოქალაქო უფლებები და მოვალეობები, წარმოიშობა სრულწლოვანების მიღწევისთანავე.

ჯანდაცვის მსოფლიო ორგანიზაციამ (WHO) ყოველწლიური ანგარიში გამოაქვეყნა, რომელშიც განმარტებულია 10 გლობალური საშიშროება, რომელიც კაცობრიობას ემუქრება. სიაში პირველად მოხვდა ტრენდი, რომელიც ვაქცინაციაზე გააზრებული უარის თქმისკენ მოუწოდებს.

ორგანიზაციაში აცხადებენ, რომ ამ ტრენდის წახალისება ეპიდემიებთან ბრძოლის მრავალწლიან წარმატებას წყალში ჩაყრის. ანგარიშში წერია, რომ, მაგალითად, წითელას დაავადების მომატება, ხშირ შემთხვევაში უკავშირდება ვაქცინაციაზე უარის თქმას. 

ჯანდაცვის მსოფლიო ორგანიზაციის მონაცემებით, ვაქცინაცია ნაადრევი სიკვდილისგან საშუალოდ 2-3 მილიონ ადამიანს იხსნის.