რუსეთი რაკეტების ლიკვიდაციის შეთანხმებიდან გამოვიდა

ვლადიმერ პუტინმა ხელი მოაწერა განკარგულებას, რომლის თანახმადაც რუსეთი ახლო და საშუალო მანძილზე მოქმედი რაკეტების ლიკვიდაციის შესახებ შეთანხმების შესრულებას წყვეტს. ინფორმაციას კრემლის პრესამსახური ავრცელებს.

ამასთან, რუსეთის პრეზიდენტმა საგარეო საქმეთა სამინისტროს დაავალა, რომ თავის გადაწყვეტილების შესახებ ამერიკულ მხარეს ინფორმაცია მიაწოდოს. 

2017 წლის ბოლოს რუსეთის პრეზიდენტმა ვლადიმერ პუტინი ამბობდა, რომ რუსეთი შეთანხმებიდან გასვლას არ აპირებდა.

2018 წლის ოქტომბერში კი ცნობილი გახდა, რომ შესაძლოა აშშ ამ შეთანხმებიდან გასულიყო. მოგვიანებით ეს ინფორმაცია დონალდ ტრამპმა დაადასტურა.

„ახლო და საშუალო მანძილზე მოქმედი რაკეტების ლიკვიდაციის შესახებ შეთანხმებას“ (INF Treaty) 1987 წლის 8 დეკემბერს სსრკ-ს პრეზიდენტმა მიხეილ გორბაჩოვმა და აშშ-ის პრეზიდენტმა რონალდ რეიგანმა მოაწერეს ხელი. სახელმწიფოები შეთანხმდენენ, რომ გაანადგურებდნენ და აღარ აწარმოებდნენ მომავალში დედამიწაზე ბაზირებულ ახლო (500-დან 1000 კმ-მდე) და საშუალო (1000-დან 5,5 ათას კმ-მდე) მანძილზე მოქმედ ბალისტიკურ და მფრინავ რაკეტებს. მოწინააღმდეგის ტერიტორიის მახლობლად განთავსებულ ასეთ რაკეტებს მიზნამდე მიღწევა რამდენიმე წუთში შეეძლო. შეთანხმების პრეამბულაში ნათქვამია, რომ მხარეებმა გადაწყვიტეს ამ დოკუმენტის გაფორმება, რადგან „აცნობიერებენ, რომ ბირთვულ ომს კაცობრიობისთვის დამანგრეველი შედეგები ექნება“.