პუტინი: თუ აშშ ახლო და საშუალო მანძილზე მოქმედ რაკეტებს შექმნის, იმავეს გაკეთება მოგვიწევს

რუსეთის პრეზიდენტის ვლადიმერ პუტინის განცხადებით, მოსკოვი იძულებული იქნება ახლო და საშუალო მანძილზე მოქმედი რაკეტების წარმოება დაიწყოს, თუ შესაბამისი შეთანხმებიდან გასვლის შემდეგ ამას აშშ გააკეთებს. ინფორმაციას ამის შესახებ Reuters-ი ავრცელებს.

უსაფრთხოების საბჭოს წევრებთან შეხვედრაზე პუტინმა საგარეო საქმეთა მინისტრს, თავდაცვის მინისტრსა და საგარეო დაზვერვის სამსახურს დაავალა, ყურადღებით დააკვირდნენ აშშ-ს ქმედებებს ამ მიმართულებით.

„თუ რუსეთისთვის ცნობილი გახდება, რომ აშშ-მ ასეთი სისტემები შექმნა და მათ წარმოებას იწყებს, ჩვენ არ დაგვრჩება სხვა გზა გარდა იმისა, რომ სარკისებრი ზომები მივიღოთ და მსგავსი რაკეტები შევქმნათ“, - განაცხადა პუტინმა.

მან ასევე ვაშინგტონს შეთანხმების ირგვლივ მოლაპარაკებების განახლებისკენ მოუწოდა.

„რათა თავიდან ავიცილოთ ქაოსი, სამყარო წესებისა და შეზღუდვების გარეშე, უნდა გავიაზროთ ყველა საფრთხე და დავიწყოთ სერიოზული დიალოგი“, - აღნიშნა პუტინმა.

1 აგვისტოს ცნობილი გახდა, რომ აშშ „ახლო და საშუალო მანძილზე მოქმედი რაკეტების ლიკვიდაციის შეთანხმებას“ ტოვებს.

საშუალო და ახლო მოქმედების რაკეტების ლიკვიდაციის შეთანხმება (Intermediate-Range Nuclear Forces (INF)) სსრკ-ის მაშინდელ პრეზიდენტს მიხეილ გორბაჩოვსა და აშშ-ის მაშინდელ პრეზიდენტს რონალდ რეიგანს შორის 1987 წლის 8 დეკემბერს გაფორმდა. ეს ცივი ომის ერთ-ერთ ყველაზე მნიშვნელოვან შეთანხმებად მიიჩნევა. მაშინ მოსკოვმა და ვაშინგტონმა უარი თქვა საშუალოდ ახლო მოქმედების ბალისტიკური და საკრუიზო რაკეტების შექმნაზე და არსებულის განადგურებაზე შეთანხმდნენ. ასეთ რაკეტებს მიზნამდე მიღწევა რამდენიმე წუთში შეუძლიათ. 

შეთანხმების პრეამბულაში წერია, რომ მხარეებმა ამ დოკუმენტზე ხელმოწერა გადაწყვიტეს, რამეთუ იაზრებენ, რომ "ბირთვულ ომს მთელი კაცობრიობისთვის დამანგრეველი შედეგები ექნება". შეთანხმება ძალაში ხელმოწერისთანავე შევიდა. 

რუსეთმა „ახლო და საშუალო მანძილზე მოქმედი რაკეტების ლიკვიდაციის შესახებ შეთანხმება“ მიმდინარე წლის მარტში დატოვა. შესაბამის ბრძანებას ხელი ქვეყნის პრეზიდენტმა ვლადიმერ პუტინმა მოაწერა. 

რა არის „ახლო და საშუალო მანძილზე მოქმედი რაკეტების ლიკვიდაციის შესახებ შეთანხმება“ და რატომ არის ის მნიშვნელოვანი? - წაიკითხეთ ბმულზე.