კომპანიამ განმარტა რატომ ათავსებენ მკვდარ ძაღლებს ორმოში

კომპანია "სევერის" წარმომადგენელმა ჯემალ გოგიტიძემ ბათუმის ნაგავსაყრელთან ნაპოვნი მკვდარი ძაღლების შესახებ განმარტება გააკეთა. მისი თქმით, ბეიკერის ორმოში ათავსებენ იმ ძაღლებს, რომლებიც დაავადებულები არიან და ქალაქში ეპიდემიის საშიშროებას ქმნიან.

ჯემალ გოგიტიძის თქმით, ისინი ცხოველებს არ ხოცავენ და ქალი, რომელმაც ვიდეო გადაიღო, ცრუ ინფორმაციას ავრცელებს.

"ამ საკითხით ალბათ სამართალდამცავი ორგანოები დაინტერესდებიან. მეც დაინტერესებული ვარ, რომ გამოიძიონ, როგორ მოხდა დალუქული ე.წ. ბეიკერის ორმოების გახსნა. ამ ქალბატონის მისვლის შემდეგ ბოქლომები აღარ არის. ეს შეგნებულად მოწყობილი პროვოკაციაა", - თქვა კომპანიის წარმომადგენელმა. მისი განმარტებით, გუშინ საღამოს ორმოებზე ბოქლომები იყო დადებული, დღეს კი მათმა თანამშრომელმა ნახა, რომ დალუქული აღარ იყო.

ფაქტის შესწავლა შს სამინისტრომ დაიწყო. როგორც უწყებაში განაცხადეს, ეს ტერიტორია ოფიციალურად არის გამოყოფილი მკვდარი უპატრონო ძაღლების დასამარხად.

მოქალაქემ ბათუმის ნაგავსაყრელთან ვიდეო გადაიღო, რომელშიც ნაგავსაყრელზე დაყრილი მოკლული ძაღლებია აღბეჭდილი. ვიდეოში ჩანს, რომ დახოცილი ძაღლები პოლიეთილენის პარკებშია მოთავსებული. ვიდეოს ავტორის თქმით, ამ ტერიტორიაზე მკვდარი ძაღლები მიკროავტობუსით გვიან ღამით მიაქვთ ხოლმე.

ბათუმის მერიაში ამბობენ, რომ ქალაქში უპატრონო ძაღლებზე ტენდერში გამარჯვებული კომპანია ზრუნვას, თუმცა კომპანია ძაღლებს არ კლავს, არამედ ბუნებრივი სიკვდილის შემდეგ მარხავს.